Reforma Zgjedhore, diskutohet propozimi i shoqërisë civile
PD dhe PS, gati draftet e punuara në komisionet paralele
Reforma Zgjedhore që nuk mundi të përmbyllej brenda vitit të shkuar, për shkak edhe të gjendjes që prodhoi tërmeti i 26 nëntorit, pritet të jetë kryefjala e politikës shqiptare në këta muaj të parë të 2020- ës.
Komisioni Parlamentar i Reformës Zgjedhore me PSnë dhe opozitën në Kuvend, nga njëra anë, dhe PD- në me aleatët nga ana tjetër, në këta muaj kanë punuar paralelisht mbi disa drafte në shumë prej çështjeve që ndajnë palët dhe që janë kërkuar që të ndryshohen. Sistemi zgjedhor, votimi elektronik, vota e emigrantëve, administrata zgjedhore, reformimi i KQZ- së, financimi i partive, janë vetëm disa nga çështjet e nxehta të Reformës Zgjedhore, për të cilat palët kanë qëndrime të kundërta.
Deri më tani, të gjitha palët janë ulur së bashku për të diskutuar vetëm në dy raste dhe të dyja këto tryeza kanë qenë të organizuara nga OSBE- ja. Partia Demokratike me aleatët e saj e ka refuzuar ftesën e PS- së për të marrë pjesë në Komisionin Parlamentar dhe nga ana e saj ngriti një komision me ekspertët e vet, të cilët po punojnë mbi disa dokumente. Po ashtu, edhe maxhoranca me opozitën parlamentare kanë punuar disa drafte të hartuara nga ekspertët e kontraktuar nga Kuvendi. Në javën që shkoi, organizata e shoqërisë civile, “Nisma Thurje”, depozitoi në Kuvend një projektligj të mbështetur nga 50 mijë qytetarë dhe dy deputetë të opozitës së re për të ndryshuar sistemin zgjedhur dhe për të kaluar në proporcionalin kombëtar me lista të hapura. Ky projektligj do të diskutohet në Komisionin Parlamentar gjatë këtyre javëve. Deputetët e rinj në Kuvend janë shprehur hapur pro këtij varianti dhe e kanë kushtëzuar pranimin e tij me votën e tyre. PS- ja nuk është shprehur për asnjë lloj sistemi. Po ashtu, edhe Opozita e Bashkuar nuk është ndalur në një sistem të caktuar, por ka vënë theksin në çështjen e dekriminalizimit.