Viktima e kishte denoncuar për kanosje
Rreth 4 muaj më parë, 38- vjeçarja Enkeleda Çapoku, i ishte drejtuar Komisariatit nr. 5, në Kamzë, ku kishte ngritur disa shqetësime në lidhje me vëllain e burrit, i cili mbrëmjen e së enjtes e vrau. Burime nga Policia thanë se ajo kishte shkuar në Komisariat në muajin shtator dhe pasi ka marrë kontakt me një oficer aty, i ka treguar se kishte probleme me kunatin Erdet Çapoku, por kishte ngurruar që të bënte denoncim. Megjithatë, oficeri i Policisë e ka bindur që të bëjë kallëzim në lidhje me shqetësimet që ajo kishte, pasi bëhej fjalë për vepër penale. Ajo pretendonte se kunati e kishte ndjekur në rrugë, e kishte fotografuar, madje i kishte thënë edhe se do ta vriste. Pasi i është marrë kallëzim 38- vjeçares, dosja është referuar në Prokurori dhe aktualisht çështja ishte nën hetim.
Enkeleda Çapoku, 38- vjeçarja që u masakrua nga kunati i saj të enjten në zonën e Paskuqanit, në Tiranë, u përcoll dje për në banesën e fundit.
Ceremonia mortore nisi në orën 11: 00, nga banesa ku ajo mbeti e vrarë, dhe u mbyll në varrezat e Paskuqanit. Familjarë, të afërm, miq e banorë të zonës i dhanë lamtumirën e fundit 38- vjeçares. Por, bashkëshorti i saj mungonte. Elton Çapoku e pati të pamundur të merrte pjesë në varrim, pasi leja që kishte kërkuar nga Drejtoria e Burgjeve, nuk iu aprovua. Nga ana tjetër, mësohet se familjarë të tij ishin të pranishëm në ceremoninë mortore të Enkeledës. Ngjarja e rëndë ndodhi të enjten, rreth orës 23: 40, në një apartament në katin e dytë të një pallati të vjetër në zonën e Paskuqanit, aty ku jetonte viktima bashkë me vajzën 18 vjeçe dhe nënën e saj. Autori i dyshuar i krimit është Erdet Çapoku, vëllai i burrit të saj. Ky i fundit u largua me biçikletë menjëherë pasi kreu krimin e rëndë, për t'u arrestuar rreth 13 orësh më pas nga shërbimet e Komisariatit nr. 4, pranë një karburanti në zonën e Laprakës.
KRIMI HORROR Para se të kryente vrasjen, 34- vjeçari Erdet Çapoku kishte qëndruar duke pirë në një lokal jo shumë larg pallatit ku banonte kunata e tij. Më pas, është larguar nga lokali me biçikletë, me të cilën lëvizte gjithmonë, dhe ka shkuar në apartamentin e viktimës. Aty ndodheshin, si çdo natë, 38vjeçarja Enkeleda me vajzën e saj 18 vjeçe dhe nënën, Xhevairen, e cila flinte thuajse çdo natë me to. Siç kanë dëshmuar në Polici, nëna dhe vajza e viktimës, ato ishin shtrirë për të fjetur, kur kanë dëgjuar derën, që dikush i binte me forcë. Pranë derës ka shkuar nëna e viktimës, e cila ka pyetur se kush ishte dhe në momentin që i dyshuari ka folur, ka refuzuar ta hapë. Por brenda pak sekondash, ai e ka hapur derën me forcë, duke e shqyer. Menjëherë sapo është futur brenda, ai është drejtuar te dhoma e gjumit ku ndodhej kunata e tij dhe ka nisur ta godasë me hanxhar në pjesë të ndryshme të trupit e më pas në kokë me një levë hekuri. Enkeleda ka rënë në tokë e përgjakur dhe ka ndërruar jetë brenda 4 minutash. I dyshuari është larguar menjëherë nga vendngjarja. Ndërsa aty ka shkuar një patrullë e Komisariatit nr. 5, që ka mbërritur në kohë rekord, duke qenë se ndodhej shumë pranë vendit të ngjarjes. Megjithatë, autori kishte arritur të largohej. Erdet Çapoku është arrestuar të premten, rreth orës 13: 00, falë informacioneve që kanë dhënë qytetarë të ndryshëm, të cilët kishin para fotografinë e tij në media.