Si shpëtoi gjenerali i dytë i shënjestruar në Jemen, në të njëjtën kohë me Soleimanin
Tensionet mes SHBA dhe Iranit u përshkallëzuan javën e kaluar pasi Presidenti Donald Trump urdhëroi një sulm preciz, që vrau komandantin iranian Qassem Soleimani. Soleimani ishte duke komplotuar “sulme të menjëhershme” ndaj amerikanëve, sipas Trump, i cili shtoi se aksioni ishte marrë për të ndaluar një luftë. Pentagoni fajësoi Soleimanin dhe forcën e tij Quds për sulme në bazat e koalicionit në Irak muajt e fundit, përfshirë sulmin e 27 dhjetorit që vrau një kontraktues amerikan dhe personelin irakian si dhe sulmin e ambasadës amerikane në Bagdad, më 31 dhjetor. Por tensionet mund të ishin edhe më të larta se kaq. Në planet e Uashingtonit kishte qenë edhe vrasja e një tjetër gjenerali iranian në Jemen. Sipas “Washington Post”, forcat amerikane kryen një tjetër mision të lartë sekret kundër Abdul Reza Shahlai, një financier dhe komandant kryesor në elitën “Quds Force” të Iranit, që ka qenë aktiv në Jemen. Sulmi nuk rezultoi në vdekjen e tij, sipas katër zyrtarëve amerikanë të njohur me çështjen. Vrasja e Qassem Soleimanit javën e kaluar ishte pjesë e një operacioni më të gjerë nga sa u shpjegua më parë, duke ngritur pyetje nëse misioni ishte krijuar për të dëmtuar udhëheqjen e Trupave të Gardës Revolucionare Islamike apo vetëm për të parandaluar një sulm të afërt ndaj amerikanëve në rajon, siç u tha fillimisht. Zyrtarët e ShBA thanë për “Washington Post” që operacioni kundër Shahlai mbetet shumë i klasifikuar, dhe shumë nuk pranuan të ofrojnë detaje përveç që të thoshin se dështoi. Zyrtarët në Pentagon dhe në komandat ushtarake në Florida po monitoronin të dyja sulmet dhe kishin diskutuar për njoftimin e tyre së bashku, nëse do të kishin shkuar mirë. Të dyja sulmet ishin të autorizuara afërsisht në të njëjtën kohë dhe Shtetet e Bashkuara nuk folën për misionin ndaj Shahlai sepse nuk shkoi sipas planit. Shahlai mund të jetë në shënjestër në të ardhmen, megjithëse të dyja vendet kanë sinjalizuar interes për të ulur përshkallëzimin e krizës për vrasjen e Soleimanit.