Taksa e shtëpisë, si përfitojnë pensionistët

Kriteret për t’u përjashtuar nga pagesa mujore pensionistët kryefamiljarë. Lista e dokumenteve që duhen dorëzuar tek Ujësjellësi.

Cilat janë kriteret që përjashtojnë nga pagesa mujore e taksës së re të pronës pensionistët kryefamiljarë. Dokumentet që duhen dorëzuar

Prej dy muajsh, të gjitha familjeve në kryeqytet që posedojnë një pronë, dyqan a garazh, iu është shtuar në faturën e ujit një taksë e re, ajo për pronën.

Implementimi i saj ka nxjerrë në pah problematikat e para, kryesisht nga kategori që pretendojnë të mos e paguajnë këtë detyrim. Pensionistët janë një prej tyre.

KUSHTET Si në vendim, ashtu dhe në daljet për media, përfaqësues të Drejtorisë së Ujësjellës Kanalizime kanë sqaruar se nuk mjafton të trajtohesh me pension pleqërie ose pension social për të mos paguar taksën e re. Nga vendimi për përjashtimin nga ky detyrim përfitojnë vetëm pensionistët kryefamiljarë. Kjo nënkupton se në certifikatën e gjendjes civile ata duhet të figurojnë të vetëm ose me bashkëshorten, gjithashtu pensioniste, ose me fëmijë në ngarkim, por të paaftë për punë. Veç kësaj, si prona, ashtu edhe kontrata me Ujësjellësin, duhet të jenë në emrin e pensionistit kryefamiljar dhe jo të një fëmijë madhor që “de jure” nuk jeton me të ( rrjedhimisht nuk mund të përfitojë shmangie pagese). Ata që nuk plotësojnë qoftë edhe njërin prej këtyre kritereve, nuk u njihet aplikimi dhe nuk u shmangen dot taksave vendore. Në këto kushte, e vetmja zgjidhje është deklarimi i saktë i sipërfaqes dhe vlerës që ka prona ( nëse nuk e kanë bërë deri më tani), me qëllim për të ulur detyrimin, duke paguar jo më shumë nga ç’u takon. Aktualisht, për banesat që nuk ka asnjë të dhënë apo kanë refuzuar deklarimin e sipërfaqes së pronës, po përdoret sipërfaqja e prezumuar, e cila është 100 metra katrorë për ndërtimet e reja dhe 70 për të vjetrat. Në pamundësi për të përfituar zerim të kësaj takse, pensionistët e tjerë duhet të deklarojnë të dhënat për t’u taksuar drejt dhe më pak se sipërfaqja e prezumuar. Për të bërë këtë, kryefamiljari duhet të drejtohet në njësinë më të afërt të ujësjellësit bashkë me një dokument identifikimi, librezë uji dhe certifikatë pronësie bashkë me kartën shoqëruese, nga ku kryhet përllogaritja e saktë e taksës mujore. Nga kjo javë, kjo procedurë dhe çdolloj shqetësimi apo ankese mbi aplikimin e taksës mund të bëhet edhe online. Detyrimi vjetor në përllogaritjen e taksës së ndërtesës nuk është tjetër veçse shumëzim me 0.05 i vlerës së apartamentit, referuar çmimeve që ka caktuar qeveria për çdo zonë të Tiranës dhe sipërfaqes së banesës. Mesatarisht, çdo familje paguan 300 lekë në muaj, detyrim që pensionistët dhe ata me ndihmë ekonomike e shmangin. Vlera e përfitimeve rritet nëse kësaj shume i shtohen edhe taksa për infrastrukturën arsimore ( 150 lekë/ muaj) dhe tarifa e pastrimit dhe largimit të mbeturinave ( 420 lekë/ muaj).