“Antishpifja”, OSBE kërkon rishqyrtim, Meta: Të mos ecim me kokëfortësi
“Rishikim për çështjen e nivelit të gjobave dhe proporcionalitetin”
Presidenti Meta ia ka nisur argumentimet ligjore kundër dy ligjeve për mediat edhe OSBE- së.
Përmes një njoftimi për shtyp, OSBE bën me dije se pasi është njohur me dokumentet shpjeguese të Presidentit Meta, përfaqësuesi i OSBE- së për Lirinë e Medias, Harlem Desir, shprehet i gatshëm të punojë me autoritetet shqiptare për përmirësimin e ligjit të shtypit, veçanërisht atyre pjesëve që lidhen me gjobat dhe parimin e proporcionalitetit, siç parashikohet në ligjet ndërkombëtare. Në reagimin e shkurtër për këtë çështje, OSBE thekson se do të ketë një vëmendje të veçantë që ligji të paraqesë pengesa sa i përket lirisë së shprehjes dhe mediave. Organizata për Siguri dhe Bashkëpunim në Europë shpreh besimin se ky kthim i dy ligjeve në Kuvend do të bëjë të mundur përmirësimin akoma dhe më të madh të tyre, duke qenë konform me standardet ndërkombëtare të fushës. “Përfaqësuesi i OSBE- së për Lirinë e Medias, Harlem Desir, mori sot nga Zyra e Presidentit të Republikës së Shqipërisë Ilir Meta, dokumente shpjeguese mbi arsyet e kthimit në Parlament të ligjit për median audio- vizive dhe ligjin për komunikimin elektronik në Republikën e Shqipërisë. Në funksion të ekzaminimit të ri të ligjeve nga Parlamenti, përfaqësuesi konfirmon se ai është i gatshëm të vazhdojë të punojë me autoritetet e Shqipërisë për të përmirësuar ligjet, veçanërisht në çështjen e nivelit të gjobave dhe respektimin e parimit të proporcionalitetit si të drejta të parashikuara në të drejtën ndërkombëtare. Përfaqësuesi kujton se legjislacioni i ri nuk duhet të pengojë lirinë e shprehjes dhe lirinë e mediave. Ai shpreson që rishqyrtimi të lejojë sqarime të mëtejshme dhe përmirësim të ligjeve, për të siguruar respektimin e plotë të standardeve ndërkombëtare dhe angazhimet e OSBE- së”, thuhet ndër të tjera në reagimin e OSBE- së për dy dekretet e Metës për Paketën Antishpifje. OSBE ishte organizata kryesore ndërkombëtare, e cila asistoi në hartimin dhe rregullimin e këtyre dy ligjeve. Draftet e para të këtyre dy ligjeve u kundërshtuan nga OSBE- ja, që i konsideroi ato të papajtueshme me standardet ndërkombëtare të lirisë së shprehjes. Por pas disa konsultimeve dhe ndryshimeve që iu bënë drafteve edhe në komisionet parlamentare, maxhoranca u shpreh se paketa ishte bërë sipas sugjerimeve të OSBEsë. Por edhe pas këtyre rregullimeve që iu bënë dhe evidentimit nga Partia Socialiste se ligjet ishin bërë sipas standardeve të OSBE- së, shumë organizata kombëtare dhe ndërkombëtare mediatike e kundërshtuan, duke pretenduar se cenon rëndë lirinë e shprehjes. Pas këtij reagimi të OSBE- së, që shpreson se me rikthimin në Kuvend këto ligje mund të përmirësohen, mbetet për t’u parë nëse maxhoranca do të ndërhyjë apo do t’i kalojë me forcën e kartonit.