“Antishpifja”, Meta: Të mos ecim me kokëfortësi në rrugën e censurës dhe autoritarizmit

“Shqipëria dy vitet e fundit ka një përkeqësim të treguesve demokratikë, sipas konkluzioneve të organizatave ndërkombëtare”

Pasi ktheu në Kuvend dy ligjet e paketës “Antishpifje”, Presidenti Meta ka bërë një tjetër thirrje për maxhorancën që të reflektojë në lidhje me këtë çështje.

Duke publikuar në rrjetet sociale argumentimet ligjore të vendimit të tij, për t’i kthyer për rishqyrtim të dyja ligjet ( ligjin për mediet audiovizive dhe ligjin për komunikimet elektronike), Meta vë theksin te rëndësia që ka liria e shprehjes dhe e mediave në vendin tonë. Kreu i shtetit, në këtë reagim të tij, thekson gjithashtu edhe raportet e organizatave ndërkombëtare, që flasin për një përkeqësim të treguesve demokratikë në Shqipëri vitet e fundit. Sipas Metës, pas kthimit në Kuvend të këtyre dy ligjeve, është koha e duhur për reflektim, në mënyrë që vendi të mos vazhdojë me kokëfortësi drejt censurës dhe autoritarizmit. Për Presidentin Meta, kjo gjë është shumë e rëndësishme, pasi sipas tij, në mes është e ardhmja europiane e vendit. Duke bërë apel që të lexohen me kujdes argumentet e tij ligjore kundër kësaj pakete, Meta kërkon reflektim nga deputetët në momentin që këto ligje do t’iu rikthehen në komisionet parlamentare dhe më pas sërish në sallën plenare. “Të dashur qytetarë. Liria e shprehjes, liria e medias dhe e drejta e informimit, përveç se janë të drejta themelore kushtetuese, janë të lidhura ngushtë me parimin e ndërtimit dhe funksionimit të një shteti demokratik. Shqipëria, dy vitet e fundit, ka një përkeqësim të këtyre treguesve, sipas konkluzioneve të organizatave prestigjioze ndërkombëtare të gazetarëve, si dhe të institucioneve ndërkombëtare që monitorojnë respektimin e lirisë së medias. Ndaj është koha për të reflektuar dhe për të mos ecur me kokëfortësi në rrugën e censurës dhe autoritarizmit, që do të përbënte rrezik për të ardhmen europiane të Shqipërisë. Edhe njëherë, i ftoj të gjithë të lexojnë me vëmendje argumentet kushtetuese dhe ligjore të kthimit për rishqyrtim në Kuvend të paketës së ashtuquajtur ‘ Antishpifje’”, shkruan Presidenti Ilir Meta në postimin e tij në rrjetet sociale. Këtë veprim të Presidentit Meta, që i ktheu të dyja ligjet për rishqyrtim në Kuvend, në fakt Kryeministri Rama e kishte paralajmëruar nga foltorja e Kuvendit ditën kur ato u miratuan. Meta, edhe para kësaj vendimmarrjeje, kishte shprehur rezervat e tij në lidhje me këto dy nisma ligjore të maxhorancës. Në argumentimet e tij kundër këtyre dy ligjeve, dje, ndër të tjera, Meta vinte theksin edhe te numri jo i plotë i deputetëve, pasi nga 140 që duhet të jenë, me largimin e PD- së dhe LSIsë tashmë janë vetëm 122. Kreu i shtetit përmendte gjithashtu papajtueshmërinë me Kushtetutën të këtyre dy ligjeve, por edhe me disa konventa ndërkombëtare, ku Shqipëria ka aderuar prej disa vitesh.