Balla: Meta i ktheu ligjet pas urdhrit të Bashës
“Dy ligjet janë të certifikuar nga OSBE, i miratojmë”
Kreu i Grupit Parlamentar të Partisë Socialiste, Taulant Balla, ka paralajmëruar se dy dekretet e kthyera nga Presidenti Meta për paketën “Antishpifje” do të rrëzohen nga maxhoranca. Në një prononcim për mediat, nga ambientet e Kuvendit, Balla u shpreh shumë i qartë në qëndrim që forca politike, që ai përfaqëson, do të mbajë. Numri dy i Partisë Socialiste e cilësoi vendimmarrjen e Presidentit Meta në lidhje me këto dy ligje si një zbatim urdhri, që sipas tij ka ardhur nga shefi i opozitës, Lulzim Basha. Për Ballën, këto dy ligje janë një përpjekje e fortë e Shqipërisë për të luftuar shpifjen dhe të pavërtetën, si një formë për ta bërë demokracinë në Shqipëri më të fortë. Kreu i grupit parlamentar të maxhorancës vuri theksin në faktin që dy ligjet, të cilat u votuan në seancën e fundit të Kuvendit për vitin 2019, u bënë konform të gjitha sugjerimeve dhe këshillave që kishte dhënë OSBE- ja. Ai shtoi se këto dy ligje marrin një rëndësi edhe më të madhe, duke pasur parasysh që këtë vit Shqipëria do të ketë për herë të parë në histori Presidencën e OSBE- së. Por numri dy i maxhorancës theksoi gjithashtu se këto dy ligje janë vetëm fillimi, pasi vendit i nevojitet një përmirësim i mëtejshëm i kuadrit ligjor për mbrojtjen nga shpifja dhe të pavërtetat që përhapen përmes medieve. Taulant Balla theksoi në fund të fjalës së tij se dekretet e Metës do të hidhen poshtë pa humbur shumë kohë, fill pas seancës që do të pasojë seancën e 20 janarit, që për këtë vit, do të jetë e para. “Unë e kam bërë komentin për këtë çështje që në seancë plenare, kur ky hap i rëndësishëm që Shqipëria hodhi për të luftuar dezinformimin si një kërcënim për cilësinë e demokracisë, jo vetëm në Shqipëri, por kudo në botën demokratike, se Presidenti Ilir Meta, pas urdhrit të Lulzim Bashës, do të kthente mbrapsht përmes një dekreti dy ligjet komponentë të kësaj pakete të parë të betejës mbi shpifjen. Sepse, kujtoj, që siç edhe e kemi thënë, legjislacioni shqiptar duhet përmirësuar sa më shumë, për të garantuar fitoren e së vërtetës ndaj shpifjes. Po ashtu, dua të ritheksoj se përmirësimet ligjore, në të dyja ligjet e paketës “Antishpifje” janë certifikuar tërësisht nga partneri ynë i rëndësishëm, siç është OSBE- ja, edhe në kuadër të faktit historik që Shqipëria ka nderin dhe përgjegjësinë e madhe të drejtojë këtë organizatë që mban në vetvete më shumë se 1 miliard qytetarë dhe më shumë se 57 vende. Kështu që, sipas procedurës parlamentare, ditën e hënë, më datë 20 janar, ardhja e dekreteve i njoftohet seancës plenare dhe më pas, menjëherë sipas procedurës, Komisioni përgjegjës do t’i shqyrtojë. Në seancën më të parë pasuese, dekretet e zotit Ilir Meta, me detyrë President, do të rrëzohen”, u shpreh Taulant Balla ndër të tjera, në prononcimin e tij për mediat. Në votimin për këto dy ligje në Kuvend, PS- së iu bashkuan edhe disa deputetë nga opozita e re parlamentare, duke shkuar në 78 vota pro.