Kapet me 41 mijë euro, arrestohet 38- vjeçari
Policia: I kishte fshehur në makinë, janë të padeklaruara
Një 38- vjeçar nga Kuçova është ndaluar ditën e djeshme nga Policia Kufitare në Kakavijë, pasi gjatë kontrollit në mjetin e tij iu gjet një shumë e padeklaruar prej 41 mijë euro. Sipas informacioneve zyrtare të Policisë së Shtetit, për këtë rast është proceduar penalisht shtetasi E. B. "Sipas të dhënave zyrtare, në vijim të kontrolleve të imtësishme, me qëllim parandalimin e krimeve ndërkufitare, shërbimet e Policisë Kufitare në P. K. K., në dalje të RSH- së, përzgjodhën për kontroll në vijën e dytë automjetin që drejtohej nga shtetasi E. B., 38 vjeç, banues në Kuçovë, i cili udhëtonte drejt Greqisë", thuhet në dosjen e policisë. Mësohet se gjatë kontrollit të ushtruar nga shërbimet e Policisë Kufitare, në bashkëpunim me shërbimet doganore, në pjesën e brendshme të automjetit u gjend e fshehur një sasi e konsiderueshme valute euro, të cilën ky shtetas po e kalonte drejt Greqisë, pa e deklaruar tek shërbimet doganore. Nga numërimi i sasisë rezultoi se ishin në total 41000 euro. Policia Kufitare e Kakavijës ka njoftuar specialistët për hetimin e krimit ekonomik e financiar në DVP Gjirokastër, të cilët në përfundim të veprimeve të para hetimore kanë filluar procedimin penal ndaj 38- vjeçarit. Materialet do t'i përcillen Prokurorisë, për veprime të mëtejshme, për veprën penale "Mosdeklarimi në kufi i të hollave dhe i sendeve me vlerë". Ndërkohë, teksa 38- vjeçari është shoqëruar për në ambientet e Policisë së Gjirokastrës është shprehur se nuk kishte dijeni se paratë duhet të deklaroheshin apo jo. Sipas tij, paratë i kishte për të kaluar disa ditë pushimi në Greqi. Vijojnë hetimet për zbardhjen e plotë të ngjarjes.