Rivlerësimi i shtëpive me 3%, hyn sot në fuqi ligji i ri
Në skemë edhe familjet që janë në proces legalizimi
Hyn sot në fuqi ligji "Për rivlerësimin e pasurive të paluajtshme" duke iu dhënë mundësi qytetarëve që të përditësojnë çmimet e banesave.
Ligji i miratuar në fund të vitit që lamë pas, parashikon ulje të detyrimit tatimor në 3 për qind nga 15 që është në kushte normale. Nga nisma mund të përfitojnë edhe ato familje që kanë banesa në proces legalizimi, pra që nuk e kanë marrë ende certifikatën e pronësisë. "Objekt i këtij ligji është edhe rivlerësimi i pasurive të paluajtshme, që janë në proces regjistrimi, duke përfshirë edhe pasuritë e legalizuara në përputhje me legjislacionin në fuqi. Procedurat e rivlerësimit dhe pagesës për rastet e parashikuara në këtë nen, përcaktohen me vendim të Këshillit të Ministrave", specifikohet në nenin 2 të ligjit që hyn në fuqi sot. Qeveria vendosi të rikthente amnistinë e 2017- s, por ndryshe nga 3 vite më parë, rivlerësimi nuk do të bëhet me 2 për qind, por me 3. Pas shumë diskutimesh e qëndrimesh për ta lenë të pandryshuar apo për ta rritur, u vendos vetëm gjatë votimit në Parlament që detyrimi tatimor të bëhej 3. Pas viteve ' 90, janë ndërmarrë 3 amnisti për rivlerësimin e shtëpive dhe trojeve. Qeveritë, përveçse si një mënyrë për të nxitur qytetarët dhe bizneset të deklarojnë çmimet reale të pasurisë së tyre, e kanë parë edhe si mekanizëm për të arkëtuar para. Rreth 4 miliardë lekë apo 40 milionë dollarë parashikohet të arkëtohen këtë vit nga kjo nismë, e cila do të zgjasë deri më 31 gusht të 2020- s, pra 9 muaj. Por, pavarësisht amnistive të ndërmarra, ajo që vihet re është se çmimet e shtëpive dhe pronave në Kadastër vazhdojnë të jenë shumë të ulëta, kjo sepse pronat e para vitit ' 92, u privatizuan me vlera shumë të ulëta dhe nuk u rivlerësuan. Po ashtu, qytetarët me vetëdije i kanë deklaruar shtëpitë më pak, në raport me vlerën reale që kanë, me qëllim uljen e detyrimit tatimor.