"2019- ta nuk ishte i suksesshëm për kombëtaret, ja objektivat"
Kombëtarja U- 17 është e grumbulluar prej ditësh në Durrës, ku edhe është përgatitur për turneun miqësor që do të luajë në Turqi. Për këtë turne, trajneri Elvin Beqiri ka folur në faqen zyrtare të FSHF- së, duke treguar edhe objektivat e këtij ekipi përfaqësues në turneun miqësor. "E vërteta është se 2019- ta nuk ishte një vit suksesi për ekipet kombëtare shqiptare, por gjithsesi ajo që është më kryesore dhe parimore është evidentimi i elementeve të rinj dhe dërgimi i tyre në ekipin U- 19 e deri te Kombëtarja A. Besoj që vitin e shkuar kemi zgjedhur elementë mjaft cilësorë. Në atë brez kemi lojtarë premtues, të cilët do të vazhdojnë të jenë pjesë e përfaqësueseve të Shqipërisë, ku sigurisht do ta shikojmë sërish gjendjen e tyre dhe formën në klubet përkatëse. Shpresojmë të punojnë mirë edhe të përfaqësojnë ngjyrat e Kombëtares. Në lidhje me seleksionimet, vendet e reja që kemi vëzhguar janë Gjermania edhe Danimarka, duke shtuar edhe Greqinë dhe Italinë. Ne do të zhvillojmë disa seleksionime gjatë vitit, në mënyrë që të bëjmë një vlerësim sa më të mirë dhe korrekt, me qëllimin kryesor të gabojmë sa më pak në përzgjedhje. Qëllimi në turneun e Turqisë është paraqitja sa më e mirë dhe marrja e rezultatit për të qenë gjithmonë me moralin e mirë dhe të motivohen, pasi bëhet fjalë për Kombëtaren shqiptare dhe jo të gjithë e kanë mundësinë të jenë pjesë e saj", ka deklaruar Beqiri për faqen zyrtare të FSHF- së. Kuqezinjtë U- 17 do t'i luajnë ndeshjet nga data 15 deri më 21 janar.