Dritan Dajti në ish- Bllok, shkarkohen 4 zyrtarë të Burgjeve
Lëvizja e të burgosurit: Cenim i rendit e i sigurisë publike
Shoqërimi i të dënuarit Dritan Dajti për në një klinikë private disa ditë më parë, çoi në shkarkimin e 4 zyrtarëve të Burgjeve dhe paralajmërimin e dy të tjerëve.
Ministria e Drejtësisë njoftoi dje se kishte hetuar rastin, nga ku janë konstatuar shkelje të rënda të drejtuesit të Burgut të Peqinit, Emin Shpata, dhe drejtuesit të Policisë së Burgjeve, Bardhyl Kaçorri. Nga kjo situatë është shkarkuar edhe mjeku i burgut, Andi Andoni, dhe shefi i Forcave Operacionale, Ferit Mici. Ministria e Drejtësisë ka dalë në konkluzionin se strukturat drejtuese dhe të kujdesit shëndetësor në IEVP- në Peqin si dhe strukturat shëndetësore e policore në Drejtorinë e Përgjithshme të Burgjeve, të përfshira në trajtimin e rastit konkret, nuk kanë ndjekur procedurat ligjore dhe rregulloret e brendshme për vlerësimin e kërkesës së të dënuarit për kontrolle mjekësore jashtë institucionit të burgjeve. “Stafi mjekësor e drejtues në IEVP- në Peqin nuk kanë kryer asnjë proces vlerësimi të kërkesës në profilin mjekësor dhe operacional të riskut dhe nuk ka marrë në konsideratë asnjë mundësi për kryerjen e vizitave mjekësore pranë strukturave shëndetësore publike të afërta me institucionin e vuajtjes së dënimit”, njoftoi dje Ministria.
SIGURIA Sipas Ministrisë, nga strukturat e Policisë së Burgjeve të përfshira në këtë rast rezulton se nuk është kryer një vlerësim i situatës dhe të riskut, në shkelje të Ligjit për Policinë e Burgjeve, duke mos vlerësuar dhe ndërmarrë masa të përshtatshme për shoqërimin e të dënuarit jashtë institucionit. “Duke sjellë një rrezik potencial për rendin dhe sigurinë, siç parashikohet edhe në urdhrin për shoqërimin e të dënuarve dhe paraburgosurve jashtë institucionit”, shkruhet në njoftim. Më tej është konstatuar se strukturat e Policisë së Burgjeve dhe drejtuesit e saj nuk kanë marrë miratimin e drejtorit të përgjithshëm të Burgjeve. “Kështu janë shkelur rëndë parashikimet e urdhrit Nr. 7830 datë 31.07.2018 ‘ Përgatitja dhe planifikimi i udhëtimit’ si dhe ‘ Rregullat dhe masat e sigurisë gjatë shoqërimit në gjykatë dhe qendra spitalore’, në të cilët parashikohet se përveç rasteve të urgjencës, të burgosurit që kanë nevojë për masa të larta sigurie nuk duhet të nxirren jashtë, pa autorizim paraprak të drejtorit të përgjithshëm”. Ministria e konsideron këtë situatë si cenim të rendit dhe sigurisë publike. “Në rastin e planifikimit për vizitë të të dënuarit D. Dajti, nga hetimi rezultoi gjithashtu se në planin e masave nuk janë parashikuar masa lidhur me sigurinë e klinikës private dhe nuk është bërë një vlerësim paraprak i lëvizjeve të trupave shoqëruese. Lëvizja e të dënuarit të sigurisë së lartë nga Burgu i Peqinit në qendër të Tiranës ( zonën e ish- Bllokut), në shkelje të parashikimeve ligjore dhe të gjitha rregullave të mësipërme, përbën cenim të rendit dhe sigurisë publike”, njoftoi Ministria e Drejtësisë.