Rrëzoi ligjin e censurës, Meta vlerësohet nga gazetarët e huaj
“Vërteton se sindikatat kanë fuqinë për të mbrojtur lirinë e shtypit”
Federata Ndërkombëtare e Gazetarëve përshëndet vendimin e Presidentit Meta për kthimin për rishqyrtim në Kuvend të Paketës “Antishpifje”. Ajo e cilëson si një sukses të Shoqatës së Gazetarëve Profesionistë në Shqipëri. Federata Ndërkombëtare e Gazetarëve shprehet se ligjet kundër shpifjes nuk duhet të përdoren si mjete për të kufizuar lirinë e shtypit. “Një sukses për Shoqatën e Gazetarëve profesionistë të Shqipërisë. Presidenti i Shqipërisë, Ilir Meta, ka vënë veton ndaj një pakete të diskutueshme të ligjit antishpifje, që do të ngufasë mediat në internet. Kjo vërteton se sindikatat kanë fuqinë për të mbrojtur # Lirinëeshtypit!”, thotë Federata Ndërkombëtare e Gazetarëve. Meta dekretoi kthimin për rishqyrtim të paketës antishpifje me pretendimin se cenon të drejtën kushtetuese të lirisë së fjalës dhe medias, duke radhitur dhe argumentet ligjore. Dy ditë më parë, edhe Organizata Ndërkombëtare e
Gazetarëve, “Reporterët pa kufij”, me shtrirje në të gjithë botën, ka përshëndetur vendimin e Presidentit Meta për të kthyer dy ligjet e paketës antishpifje në Parlament.
Përmes një postimi në rrjetet sociale, “Reporterët pa kufij” e cilësojnë këtë vendimmarrje të Metës si shumë pozitive, kundër tentativës së qeverisë për të vënë nën kontroll mediat. “‘ Reporterët pa Kufij’ mirëpresin vendimin e Presidentit të Shqipërisë, Ilir Meta, për të rikthyer në Parlament 2 ligjet e së ashtuquajturës paketë antishpifje, që shihet si një përpjekje e qeverisë për të kontrolluar median në kundërshtim me Kushtetutën shqiptare dhe Konventat e të Drejtave të Njeriut”, thuhet në reagimin e organizatës “Reporterët pa kufij”, që mbron të drejtat e gazetarëve në të gjithë botën. Kjo organizatë ishte ndër më aktivet që dolën haptazi kundër kësaj pakete ligjore, duke ngritur alarmin për rrezikun që i kanosej medias shqiptare. Në raportet e përvitshme që bën për lirinë e shprehjes dhe cilësinë e medias, “Reporterët pa kufij” ka vënë theksin te roli i madh shtypës që ushtron mafia dhe politika në punën e përditshme të gazetarëve shqiptarë. Në raportin e vitit të shkuar, kjo organizatë ka ngritur zërin në lidhje me presionin dhe intimidimin që është bërë ndaj disa gazetarëve të terrenit në Shqipëri, lidhur drejtpërdrejt me publikimet e tyre në mediat ku punojnë. Në fillim të javës, Presidenti Meta ktheu paketën antishpifje, duke e argumentuar se bie ndesh me parimet e Kushtetutës. “Ligjet përmbajnë elemente censuruese, që kufizojnë lirinë e shprehjes, krijojnë mjedis të pasigurt ndaj operatorëve mediatikë elektronikë”, është shprehur kreu i shtetit.