Basha sqaron Kryesinë dhe aleatët për tryezën me PS
Kreu i PD: Nuk ka amnisti për Gjiknurin, brenda javës do të dorëzojmë në SPAK dosjen për ish- ministrin
Një ditë pas takimit me maxhorancën në tryezën për të përcaktuar mekanizmin e përfundimit të Reformës Zgjedhore, kreu i selisë blu mblodhi dje rreth orës 17: 00 Kolegjin e Kryetarëve e pas tyre edhe ish- Grupin Parlamentar e kryesinë për t’iu sqaruar “marrëveshjen”.
Deklaratat e bëra më herët në një konferencë për mediat, kreu i selisë blu ua komunikoi edhe të tijve. Por, sipas burimeve nga brenda mbledhjes, mësohet se kryedemokrati i ka porositur kryetarët e rretheve që të jenë të përgatitur për zgjedhje të parakohshme. “Ky do të jetë viti i të djathtëve, duhet të jemi gati për zgjedhje të parakohshme”, mësohet të ketë thënë kreu i selisë blu. Po ashtu, mësohet se dy prej kryetarëve të rretheve i kanë propozuar kryetarit të PD- së, Lulzim Bashës, që pas një muaji të organizojnë një protestë kombëtare, e cila përkon me 1 vjetorin e djegies së mandateve dhe me 20 shkurtin. Kjo ka qenë edhe pika që ka marrë vëmendjen më të madhe të demokratëve në takimin e djeshëm, por pa dalë në një vendimmarrje. Pasi përcolli kryetarët e rretheve, Basha priti ish- Grupin Parlamentar dhe kryesinë e PD- së. Burime nga brenda mbledhjes bën me dije se kryedemokrati u ka treguar atyre reagimin e Gjermanisë pas marrëveshjes për Reformën Zgjedhore, si dhe në lidhje me detajet teknike, sa i përket mekanizmit që do të përdoret për të çuar përpara reformën. Po ashtu, sipas burimeve, kryedemokrati Basha u ka thënë ish- deputetëve dhe anëtarëve të kryesisë se brenda kësaj jave, do të çojnë dosjen në Prokurorinë speciale për bashkryetarin e Reformës Zgjedhore, Damian Gjiknurin. Por ky nuk ishte takimi i fundit për të mërkurën i kryetarit të PD- së, Lulzim Basha. Ai priti më vonë edhe aleatët e PD- së. Në takimin me dyer të mbyllura, u caktuan anëtarët e këshillit politik, që do të përfaqësojë opozitën në grupin e punës për Reformën Zgjedhore me maxhorancën. Mësohet se nga Partia Demokratike është përzgjedhur ish- deputeti Oerd Bylykbashi, nga LSI- ja, Petrit Vasili, nga PR- ja, Fatmir Mediu. Pjesë e këshillit politik në Reformën Zgjedhore do të jetë edhe Mesila Doda e PDIU- së dhe Vangjel Dule i PBDNJ- së. Ndërkohë, ditën e sotme pritet që të ketë një tryezë me të gjitha partitë politike, maxhorancë dhe opozitën, për të diskutuar mbi axhendën e grupit të punës. Në dokumentin e prodhuar nga tryeza e ditës së martë, u ra dakord që drafti konsensual i Reformës Zgjedhore të jetë gati deri më 15 mars të këtij viti. Ndërkohë, Parlamenti do të miratojë pa ndryshuar asnjë nen dokumentin e dakordësuar nga grupi i punës.