Marrëveshja për reformën, Wadephul: Kusht i Bundestagut
"Dialogu i hapur e gjithëpërfshirës është një hap i rëndësishëm"
Nënkryetari i Grupit më të madh Parlamentar në Parlamentin gjerman, CDU/ CSU, Johann David Wadephul, tha dje se marrëveshja për Reformën Zgjedhore ishte një nga kushtet e Bundestagut gjerman.
Në një deklaratë ekskluzive për DW shqip, nënkryetari i grupit më të madh parlamentar, në Parlamentin gjerman, CDU/ CSU, Johann David Wadephul, e ka përshëndetur arritjen e marrëveshjes mes pozitës dhe opozitës së bashkuar në Shqipëri për hartimin e ligjit të ri zgjedhor: "Grupi parlamentar i CDU/ CSU, në Parlamentin gjerman, e përshëndet marrëveshjen e djeshme midis qeverisë dhe opozitës. Dialogu i hapur dhe gjithëpërfshirës i dakorduar tani mes të gjitha forcave politike është një hap i rëndësishëm për hartimin e Reformës së re Zgjedhore, e cila duhet të jetë plotësisht në përputhje me rekomandimet e OSBE/ ODIHR- it, siç e ka kërkuar edhe Bundestag- u gjerman në rezolutën e tij të 26 shtatorit 2019. Ne i inkurajojmë të gjitha palët që në këtë frymë mbipartiake të përfundojnë me sukses punën ende të vështirë për reformimin e ligjit zgjedhor", thuhet në deklaratën e deputetit kristiandemokrat, i cili është njëkohësisht edhe kryetar i grupit të punës për Ballkanin Perëndimor të kësaj partie në Bundestag. Vënia në vijë e Reformës
Zgjedhore ishte, krahas plotësimit të stafit të nevojshëm për funksionimin e Gjykatës Kushtetuese, një nga dy kushtet e vëna nga Bundestagu gjerman për fillimin e procesit të çeljes së negociatave të Shqipërisë me BE- në. "Sado i mirëpritur është ky kompromis, deri tani ai ka zgjidhur vetëm çështjen procedurale. Tashmë Bundestagu do të shohë edhe përmbajtjen që do të dalë nga kjo marrëveshje", bëhet e ditur nga qarqet kristiandemokrate dhe kristiansociale në Bundestag.