Biznesi gjerman: Problem emigrimi i të kualifikuarve
“Të gatshëm të bashkëpunojmë me qeverinë për të ndryshuar këtë trend”
Shoqata Gjermane e Industrisë dhe Tregtisë në Shqipëri shprehu dje shqetësimin e saj për emigrimin e vazhdueshëm të forcave të kualifikuara nga Shqipëria.
Shoqata organizoi pritjen e përvitshme të DIHA- s, për të diskutuar mbi aktualitetin ekonomik në Shqipëri me përfaqësues të biznesit dhe politikës. Në fjalën e saj, znj. Sieg përmendi faktin se zhvillimi i vazhdueshëm i Shqipërisë është për të gjithë një faktor shumë i rëndësishëm dhe d o m e t h ë n ë s . Presidentja e Shoqatës Gjermane të Industrisë dhe Tregtisë në Shqipëri, Stephanie Sieg, tha se disa sektorë të ekonomisë, si turizmi dhe energjia e r i n o v u e s h m e janë në rrugë të mbarë zhvillimi. “Megjithatë, emigrimi i vazhdueshëm i forcave të kualifikuara të punës mbetet një problem shumë i rëndësishëm i kompanive anëtare të DIHAs”, tha Sieg. Ajo u shpreh se DIHA është e gatshme të bashkëpunojë me Ministrinë e Financave dhe Ekonomisë dhe atë të Arsimit, për të gjetur mënyra që shqiptarët të mund të shohin të ardhmen e tyre profesionale brenda Shqipërisë. Gjithashtu, ajo theksoi se investimet në fushën e infrastrukturës, veçanërisht në rehabilitimin dhe ndërtimin e linjës hekurudhore Durrës- Rinas- Tiranë si dhe ndërtimi i mëtejshëm i rrugëve do të përmirësojë sistemin e transportit publik dhe do të pakësojë ndotjen e mjedisit. Ambasadori Gjerman, Peter Zingraf, theksoi në fjalën e tij se “Çdo investitor i mundshëm do të marrë vendimin final për të investuar vetëm nëse ai/ ajo është i/ e sigurt që do të gjejë një mjedis të favorshëm biznesi. Mënyra për të ecur përpara me bisedimet e pranimit në BE përfshin pikërisht elementet që janë thelbësore për çdo investitor, për krijimin e më shumë historive të suksesit dhe, rrjedhimisht, për zhvillimin ekonomik të Shqipërisë. Për vitin 2020 do të doja të inkurajoja të gjithë zyrtarët qeveritarë dhe ligjbërësit që të vazhdojnë në rrugën e reformave dhe të marrin seriozisht shqetësimet e komunitetit të biznesit”. Ministrja e Financave dhe Ekonomisë, Anila Denaj, theksoi se Gjermania është një partner strategjik i Shqipërisë, duke mbështetur sektorë të ndryshëm të ekonomisë, si energjia, ujësjellës- kanalizime, ndërmarrjet e vogla e të mesme, shkollat e formimit profesional, përshtatjen e legjislacionit shqiptar me atë europian etj.