Prokuroria: U dhanë leje në kundërshtim me ligjin
"Lejet me mungesë dokumentacioni të studimit sizmik"
Në një dalje për mediat, Prokuroria e Tiranës bëri të ditur gjetjet nga hetimet për dëmet që shkaktoi tërmeti i 26 nëntorit.
Deri mesditën e djeshme, në pranga përfunduan 31 persona, ndërsa është prerë fletë- arresti për 42 në total. Duke iu referuar fjalës së prokurorit të çështjes, Erjon Imerajt, shkeljet e konstatuara janë ndarë në dy kategori, shkelje të funksionarëve dhe ish- funksionarëve dhe të drejtuesve ligjorë dhe teknikë të objekteve të dëmtuara dhe të shpallura të pabanueshme. Sipas Prokurorisë, nga hetimi është gjetur se në dosjet për të cilat janë dhënë lejet, ka pasur mungesë "të theksuar në dokumentacion", nga studimi sizmologjik, i detyrueshëm për pallate banimi mbi 7 kate, e deri tek aktet për qëndrueshmërinë e pallateve të ndërtuara. Ndërkohë, nga drejtuesit teknikë e ligjorë të ndërtesave, është konstatuar se ka mungesa në dokumentacion sa i takon aktit të kolaudimit, në disa prej pallateve nuk është gjendur. Ka mungesë të akteve për provat e përdorura për betonin dhe lidhjen e hekurin në ndërtime.
SHKELJET SIPAS PROKURORISË
"Shkeljet, të cilat dyshohet se kanë kryer personat funksionarë publikë të ish- komunave, kanë të bëjnë me faktin se kanë miratuar leje ndërtimi në kundërshtim me ligjin dhe me mangësi të theksuara në dokumentacionin e nevojshëm për miratimin e lejes. Sikurse janë: mungon ' Studimi Sizmologjik', i cili bazuar në ligjin nr. 8405, 17/ 09/ 1998, ' Për urbanistikën', si dhe ligjin nr. 8402, datë 10/ 09/ 1998, ' Për kontrollin dhe disiplinimin e punimeve në ndërtim', është i domosdoshëm për objekte banimi mbi 7 kate; mungojnë oponencat teknike në disa leje ndërtimi të dhëna nga këto njësi; procesverbali i përfundimit të karabinasë së objekteve; procesverbali i përfundimit të punimeve të objektit; në dosje mungojnë aktet e konstatimeve të mbajtura nga zyrat e urbanistikës së ish- komunave Farkë dhe Kashar. Për objektet e legalizuara në dosje, mungojnë aktet mbi qëndrueshmërinë e pallateve".
DREJTUESIT LIGJORË
"Shkeljet të cilat dyshohet se kanë kryer drejtuesit ligjorë dhe teknikë të subjekteve, si dhe nga nënkontraktorët, janë: Ka mangësi lidhur me aktet e kolaudimit të objektit. Në disa dosje të këtyre objekteve, nuk gjendet ky akt. Gjithashtu, në dosjen e këtyre objekteve ka mangësi në disa nga aktet: akti i marrjes në dorëzim i sheshit të ndërtimit; akti i piketimit të objektit dhe i konfirmuar nga Zyra e Urbanistikës; procesverbali i gërmimit për miratimin e tabanit të themelit, shoqëruar me fotografi; procesverbali i betonimit të themelit dhe i të gjithë strukturave prej betoni të objektit, shoqëruar me fotografi; procesverbalet e lidhjes së hekurit për të gjitha elementet e objektit, shoqëruar me fotografi; procesverbalet e kryerjes së provave për betonet e përdorura në objekt; procesverbalet e provave të hekurit të përdorura në objekt; certifikatat e cilësisë së materialeve, të cilat janë përdorur në objekt; procesverbali i përfundimit të punimeve të objektit; certifikata teknike për kryerjen e punimeve nga ana e zbatuesit të punimeve; certifikata teknike për kryerjen e punimeve nga ana e mbikëqyrësit të punimeve; procesverbali i përfundimit të sistemimeve të jashtme, i konfirmuar dhe nga Zyra e Urbanistikës; në disa raste, mungon leja e shfrytëzimit të objektit të dhënë nga ana e njësive administrative".
NDËRHYRJET
"Gjithashtu, objekt hetimi kanë qenë edhe objektet e ndërtuara para viteve 1990. Nga hetimi dhe ekspertimi, ka rezultuar se nga subjekte të ndryshme është ndërhyrë në katet e para të këtyre objekteve, duke dëmtuar strukturën e pallateve, të cilat pas tërmetit janë shpallur si te pabanueshme. Si rezultat i këtyre problematikave, nga ekspertët janë konstatuar dëmtime në strukturën, rifiniturën e muraturën e disa pallateve të ndërtuara pas viteve 2007. Nga tërësia e akteve hetimore është provuar se nuk janë përmbushur kriteret e përcaktuara në ligjin për urbanistikën nr. 8405, datë 17/ 09/ 1998, i ndryshuar. Ligjin nr. 8402, datë 10.09.1998, i ndryshuar, si dhe VKM nr. 722, datë 19.11.1998, ' Për miratimin e rregullores së urbanistikës'".