Drejtuesja e Prokurorisë: Nën hetim, të gjitha objektet e shpallura të pabanueshme
Imeraj: Janë pasqyruar të dhëna fiktive të ndryshme nga ato të pasqyruara në realitet dhe ka pasur shkelje nga zyrtarë
"Janë konstatuar të dhëna fiktive dhe shkelje nga zyrtarë", tha dje drejtuesja e Prokurorisë së Tiranës, Elisabeta Imeraj.
Kjo e fundit drejtoi konferencën për mediat, ku u pasqyruan gjetjet e Prokurorisë nga hetimet dymujore për dëmet që shkaktoi tërmeti i 26 nëntorit. Procedimi penal për këtë rast është regjistruar në 27 nëntor, ndërsa pas administrimit të dokumentacionit, për të gjitha ndërtesat e shpallura të pabanueshme në Tiranë, Prokuroria ka bërë verifikim për dokumentacionin e kërkuar për lejet dhe dokumentacionin dhe veprimet që duhet të bënin ndërtuesit e objekteve. Sipas Imerajt, është vërejtur se ka "elementë ku janë pasqyruar të dhëna fiktive të ndryshme nga ato të pasqyruara në realitet", për këtë është ngritur dhe akuza e falsifikimit. Ndërkohë që në dosjet e lejeve të dhëna për disa nga këto objekte, janë konstatuar se janë dhënë edhe në mungesë të dokumentacionit. Më tej, drejtuesja e Prokurorisë tha se hetimet janë shtrirë në të gjithë Tiranën dhe se kjo është vetëm përmbyllja e fazës së parë të hetimeve. "Prokuroria e Tiranës, më 27 nëntor ka filluar hetimin pas tërmetit, duke u munduar të nxjerrë në pah shkeljet e punonjësve të administratës, por edhe ndërtuesit, që sollën si pasojë nxjerrjen e disa banesave të pabanueshme. Janë evidentuar 25 institucione, 125 pallate dhe 200 banesa të dëmtuara në Qarkun e Tiranës nga tërmeti i 26 nëntorit. Është arritur në konkluzionin se janë evidentuar dhe identifikuar autorët, që u bënë shkak e pasojë për arrestimet e djeshme, numri i të cilëve ka arritur në 31. Prokuroria ka hetuar në drejtim të identifikimit të autorëve me detyra përkatëse në institucionet shtetërore, që kanë pasur detyrë të dorëzojnë informacionet për kolaudim ndërtesash apo të bëjnë një kontroll të atyre për të cilat kanë dhënë lejet e ndërtimit. Është marrë në konsideratë dokumentacioni i çdo banese që është shpallur e pabanueshme, për të parë nëse veprimet kanë qenë në përputhje me ligjin ose jo. Ndaj është ngritur akuza për shpërdorim detyre. Nga dokumentacioni janë zbuluar edhe elemente ku janë pasqyruar të dhëna fiktive të ndryshme nga ato të pasqyruara në realitet. Ndaj është edhe vepra për falsifikim të dokumenteve dhe së fundi edhe ajo e ndërtimit të paligjshëm. Po hetohen në mënyrë të plotë të gjitha objektet që me akt konstatimi janë nxjerrë të pabanueshme. Janë të shumta në numër, por gjej rastin të falënderoj kolegët për impenjimin e tyre. Konkludimi i hetimeve është bërë për një pjesë të tyre. Falënderoj Policinë e Shtetit dhe institucionet e tjera që kanë ndihmuar në këtë hetim të nisur nga nëntori. Jemi në vijim të procesit për zona të tjera që nuk përfshijnë vetëm Vorën, Kasharin, Farkën, por ka një shtrirje për të gjitha ndërtesat në Tiranë, që janë konstatuar të pabanueshme", tha Elisabeta Imeraj.