TRAFIKIM MINASH ME CELULAR, EKSTRADOHET NGA ZVICRA I KËRKUARI
Një 43- vjeçar nga Durrësi, që ishte shpallur në kërkim ndërkombëtar për mbajtje pa leje të bombave, minave ose lëndëve plasëse, është ekstraduar dje nga Zvicra, për të vuajtur në Shqipëri dënimin prej 6 vitesh heqje lirie. Policia e Shtetit tha dje se i ekstraduari është Glerjan Hyseni. Ai ishte arrestuar fillimisht në Shqipëri gjatë një operacioni të RENREA- s, të koduar "Cikloni 4", në vitin 2008, por më pas ishte lënë i lirë. Policia tha se ky shtetas ishte shpallur në kërkim ndërkombëtar, pasi Gjykata e Shkallës së Parë për Krimet e Rënda Tiranë e ka dënuar me 6 vjet burg, për veprën penale "Mbajtja pa leje e bombave, minave ose lëndëve plasëse", e kryer në sasi të mëdha, në bashkëpunim, më shumë se një herë. Më datë 20 mars 2008, nga Drejtoria e Luftës Kundër Krimit të Organizuar në bashkëpunim me Prokurorinë për Krimet e Rënda është finalizuar operacioni i koduar "Cikloni 4", për arrestimin e shtetasve: Glerjan Hyseni, Shkëlqim Gjoka, Adrian Moçka dhe Hysen Hyka. Në një vendim të Gjykatës së Lartë, sqarohet se në kuadër të hetimit nëpërmjet përgjimeve telefonike të autorizuara, ka rezultuara se Glerjan Hyseni ishte përfshirë në mënyrë aktive në veprimtarinë e kundraligjshme të prodhimit dhe shitjes së lëndëve plasëse, armëve luftarake dhe municioneve. Prokurori ka vendosur vazhdimin e hetimeve me mjete speciale të hetimit, siç është kryerja e blerjes së simuluar nga ana e Policisë Gjyqësore. Oficerët kanë kontaktuar Hysenin, i cili u ka premtuar se është në gjendje t'u sigurojë një sasi prej 10 bombash të përgatitura me lëndë plasëse dhe në gjendje të realizojnë shpërthimin në distancë me anë të celularit, si dhe të armëve luftarake kundrejt pagimit të shpërblimit.