E rrëzoi "Venecia", zbardhen ndryshimet për tapitë me 7501

"Mosplotësimi i kritereve , jo shkak për mosligjësimin e tapive"

Në fund të këtij muaji, Agjencia e Kadastrës pritet të kalojë në Kuvend ndryshimet në ligjin "Për përfundimin e proceseve kalimtare të pronësisë", në të cilin përcaktohen procedurat për ndarjen e tokës me 7501.

Në draft janë reflektuar shqetësimet e ngritura pak muaj më parë nga Komisioni i Venecias, i cili i konsideroi nenet 7 dhe 9 të projektligjit të paqarta, të pasakta e që mund të çonin në shkelje të Konventës Europiane për të Drejtat e Njeriut. Gazeta mëson edhe përmbajtjen që do të kenë dy nenet e riformuluara.

NDRYSHIMET

Në ndryshimet e hartuara, qeveria është kujdesur që të qartësojë në nenin ku përcaktohen kushtet për ligjësimin e tapive, që, edhe në rast mosplotësimi, nuk do të ketë penalitete. Pra, plotësimi i kushteve të vendosura nuk do të jetë me patjetër domosdoshmëri. Në këtë mënyrë, Agjencia e Kadastrës nuk do të ketë të drejtë të kërkojë shfuqizimin e tyre bazuar në kushtet e caktuara në ligjin e ri. Një saktësim është bërë edhe për familjet ish- pronare. Për vlefshmërinë e titullit të pronësisë, për këto familje, do të mjaftojë vetëm një vërtetim që përfituesi ka qenë banues i njësisë administrative para themelimit të kooperativës. "Mosplotësimi i kritereve të akteve ligjore e nënligjore për ndarjen e tokës, të cilat nuk janë listuar në këtë pikë, nuk përbën shkak për mosligjësimin e AMTP- ve. Në rastin kur nuk gjendet dokumentacioni arkivor që tregon pronësinë përpara krijimit të kooperativës/ ndërmarrjes bujqësore, titulli ( AMTP) konsiderohet i vlefshëm nëse përfituesi apo trashëgimlënësi i tij ka qenë banues i njësisë administrative ( fshatit), përpara themelimit të kooperativës/ ndërmarrjes", thuhet në nenin e ndryshuar. Çfarë vlen të theksohet është se këto janë propozime paraprake dhe se deri në depozitimin e ndryshimeve në Kuvend pritet të ketë ndryshime të tjera. Sa u takon rasteve me shkelje apo abuzive që do të konstatohen, dosjet do të referohen në Gjykatë. Pra, atë funksion që deri më sot e kanë pasur komisionit vendore të kthimit dhe kompensimit, do ta ketë Agjencia e Kadastrës. Në momentin që do të konstatohen parregullsi apo paligjshmëri në dhënien e titullit, rastet do të zgjidhen nga Gjykata. Do të jetë kjo e fundit që do të ketë tagrin për të ligjësuar një tapi të dhënë me 7501 apo për ta shfuqizuar.

KUSHTET PËR TAPITË

Në maj të vitit të kaluar, kryetari i Kuvendit, Gramoz Ruçi, iu drejtua Komisionit të Venecias për mendim mbi ligjin "Për përfundimin e proceseve kalimtare të pronësisë", specifikisht nenet 7 dhe neni 9. Këto dy nene autorizonin Agjencinë e Kadastrës për të korrigjuar apo shfuqizuar titujt e pronësisë të dhëna ndër vite me anë të ligjit 7501. Sa i takon kushteve të vendosura, në ligj thuhej se tapitë do të konsideroheshin të vlefshme nëse familja ka qenë legjitimuar për të përfituar tokë sipas akteve ligjore e nënligjore për ndarjen e tokës bujqësore, atëherë kur toka e përfituar është në territorin e një kooperative apo ndërmarrjeje bujqësore. Dhe çfarë është më e rëndësishme, toka e ndarë me AMTP nuk ka qenë e llojit ( zërit kadastral) "truall", "rëra bregdetare" ose "plazhe". Sa i takon nenit 9, aty janë të përcaktuara procedurat që do të ndiqeshin për rastet e konstatuara me parregullsi apo abuzive. Kështu, kur sipërfaqja e përfituar ishte më e madhe, poseduesi mund ta blejë atë me çmim tregu. Nga ana tjetër, nëse poseduesi nuk e kërkon, e refuzon apo nuk shlyen vlerën, sipërfaqja shtetërore shtesë kalon për llogari të fondit të tokës bujqësore në administrim të njësisë së vetëqeverisjes vendore dhe jepet me qira nga kjo e fundit.