“S’vërtetohet pagesa”, si u mbyll dosja për Bashën
"Nuk ka prova që Nik Muzin ka marrë 500 mijë dollarë nga Partia Demokratike dhe 150 mijë dollarë nga Biniada Trade"
Pasi Gjykata e Tiranës rrëzoi dy akuzat ndaj kryetarit të Partisë Demokratike, Lulzim Bashës, ish- sekretarit të përgjithshëm, Arben Ristanit, dhe financierit, Ilir Dervishit, është zbardhur vendimi i plotë.
Në materialin prej 41 faqesh të vendimit të gjyqtarit Lazer Sallaku bien poshtë të dyja akuzat që rëndonin ndaj tyre për pastrim parash edhe për falsifikim dokumentesh. Në vendim, thuhet se nuk ekziston fakti penal që provon fajësinë e tyre për të dyja akuzat e ngritura nga Prokuroria. Sipas vendimit të zbardhur ditën e djeshme, nuk është bërë e mundur dot gjetja e lidhjeve mes Partisë Demokratike dhe Nik Muzin. Gjykata thotë se nuk u gjendën prova që të faktojnë dhënien e shumës prej 500 mijë dollarë nga PD- ja për Muzin dhe as të një kontrate me "Biniata Trade". "Kjo firmë ka marrë një kontribut me një shumë prej 500 mijë dollarësh përmes një skeme plotësisht në përputhje me ligjin amerikan të shqiptarëve të Amerikës, që kanë bërë një ' Found Rising' në SHBA. Nuk ka asnjë aktmarrëveshje mes Muzin dhe Partisë Demokratike. Nuk ka prova që Muzin ka marrë 500 mijë dollarë nga PD- jz dhe 150 mijë dollarë Biniada Trade", thuhet në vendimin e gjyqtarin Lazer Sallaku të Gjykatës së Tiranës. Sipas Gjykatës, nuk ka asnjë provë që të tregojë se paratë të kenë dalë nga Partia Demokratike në drejtim të ' Biniata Trade' me qëllim lobimin. Në material, gjithashtu hidhet poshtë çdo lidhje e mundshme me interesat e politikës shqiptare të Nik Muzin dhe kompanisë "Biniata Trade". Gjykata rrëzoi edhe deklarimet e Muzin se ka marrë 500 mijë dollarë nga PD- ja, pasi sipas vendimit të gjyqtarit Sallaku, kjo deklaratë është e paprovueshme. Vendimi i gjyqtarit Lazer Sallaku thotë se nuk ka kushte që të provohet fakti penal dhe se për këto arsye vendoset pushimi i çështjes ndaj të tre zyrtarëve të Partisë Demokratike, duke përfshirë edhe kreun e saj, Lulzim Bashën. "Në rastin konkret, nuk ekziston ndonjë fakt që të gjenerojë të ardhura të paligjshme, që të kemi më pas pastrim të tyre. Në këto kushte, përderisa provohet se nuk ekziston fakti penal për të cilin akuzohen të pandehurit, atëherë nuk provohet as faj, pasi nuk ekziston si elementi intelektual ashtu edhe ai evolutiv, që të ekzistojë faji si element thelbësor i përgjegjësisë penale. Në lidhje me subjektin e veprës penale, pra subjektin ( aktiv), çmoj se në rastin konkret plotësohet ky element, duke pasur parasysh nenin 12 të Kodit Penal, pasi të pandehurit plotësojnë kushtet finale për të qenë subjekt i figurës së veprës penale ' Pastrimi i produkteve të veprës penale ose veprimtarive kriminale', parashikuar nga neni 287 i Kodit Penal, pavarësisht se në rastin konkret nuk plotësohen tri kushtet e tjera të figurës së veprës penale, objekti, ana objektive dhe ana subjektive. Gjatë gjykimit, nuk provohet konsumimi i objektit, anës objektive dhe anës subjektive të veprës penale të parashikuar nga neni 287/ ç/ 2 te Kodi Penal, në ngarkim të të pandehurve Arben Ristani, Lulzim Basha dhe Ilir Dervishi. Për sa më sipër, Gjykata, bazuar në nenin 329/ b, pika "2" të Kodit Penal, nën titullin ' Shqyrtimi i kërkesës', ku parashikohet shprehimisht se: "3" Kur janë kushtet e parashikuara nga paragrafi 1 i nenit 328, Gjykata vendos pushimin e akuzës ose çështjes", si dhe në nenin 328, pika 1, germa b, të Kodit Penal çmon se duhet vendosur pushimi i procedimit penal për veprën penale të parashikuar nga neni 287/ ç/ 2, në ngarkim të të pandehurve Lulzim Basha, Arben Ristani dhe Ilir Dervishi", thuhet në vendim. Gjykata i liroi nga të dyja akuzat Bashën dhe dy zyrtarët e lartë të PDsë tri ditë më parë dhe në dalje nga seanca, avokati i kreut të demokratëve, Eduard Halimi, foli për një proces të montuar politikisht, por që pati sukses. Gjithsesi, përtej këtij vendimi të Gjykatës dhe argumentimeve të paraqitur në vendimin e zbardhur, Prokuroria ka bërë me dije se do e apelojë atë për ta çuar në shkallën e dytë. Akuza ndaj Bashës për financime të paligjshme për lobim në SHBA me para të dyshuara ruse u artikuluan fillimisht nga sekretari i përgjithshëm i PS- së, Taulant Balla. Ky i fundit inicioi gjithashtu edhe një rezolutë në Kuvend kundër ndërhyrjeve ruse, pasi siç tha, rasti i kreut të PD- së e bën një nismë të domosdoshme.