Firmoset marrëveshja, nis bashkëpunimi mes “Luarasit” e “Singidunum University”
Rektori i “Luarasit”: “Bashkëpunimi, me interes për të dyja palët” Presidenti i “Singidunum”: “Do fokusohemi te kërkimi shkencor”
Zgjerohet harta e bashkëpunimeve rajonale të universitetit “Luarasi”. Një ndër IAL- të e para private në Shqipëri, që sot renditet ndër më të mirët, ka lidhur dje një marrëveshje bashkëpunimi me të parin universitet privat në Serbi, prej të cilit dalin çdo vit mijëra të diplomuar.
Bëhet fjalë për “Singidunum University”, i cili gjithashtu ka një rrjet të gjerë universitetesh partnere prestigjioze nga Europa e deri në Shtetet e Bashkuara të Amerikës. Kërkimi shkencor, arsimi dhe mundësia e shkëmbimeve akademike me synim rritjen e cilësisë së mësimdhënies sollën në vendin tonë dhe bënë bashkë në një tavolinë titullarët e dy institucioneve. Presidenti i “Singidunum University”, Milovan Stanisic, i shoqëruar nga zv. rektori i universitetit, Nemanja Stanisic, si dhe sekretari i përgjithshëm i Zyrës Rajonale të të Rinjve për Ballkanin Perëndimor, Duro Blanusa, i prezantuan rektorit të “Luarasit”, prof. dr. Ethem Ruka, dhe zv. rektores, prof. assoc. Dr. Anni Dasho Sharko, ofertën e tyre akademike dhe mundësitë reale për shkëmbimin e përvojave të të rinjve që iu kanë besuar shkollimin. Pjesë e takimit, me rëndësi për të dyja palët, ishin edhe ambasadori i Serbisë në Shqipëri, Miroljub Zaric, dhe ambasador Dashnor Dervishi, në cilësinë e kreut të bordit të “Luarasit”.
BASHKËPUNIMI Duke përshëndetur ardhjen e homologut të tij në vendin tonë për nisjen e një bashkëpunimi me “Luarasi”, rektori, prof. dr. Ruka, nënvizoi se marrëveshja është në interesin e të dyja palëve. “Dua të theksoj që universiteti ‘ Luarasi’ nuk është një entitet më vete, por është pjesë e një grupi, ‘ Hysenbelliu group’. E vetmja mënyrë për ta rritur universitetin është vetëm cilësia. Ajo që është më e rëndësishme për ne, është se universiteti ynë është shumë i besueshëm për publikun, ashtu siç është edhe universiteti juaj. Mendoj që kjo marrëveshje është me interes dhe do të dëshiroja të mos mbetej thjesht në letër, por një marrëveshje që të dyja palët t’i japim jetë”. Kërkimi shkencor mësohet të jetë fusha e parë, me të cilën nisin marrëdhëniet midis dy universiteteve partnere. Këtë e shprehu që në krye të herës presidenti i “Singidunum
University”, Milovan Stanisic, në fjalën e tij, pas nënshkrimit të marrëveshjes me universitetin “Luarasi”. “Mendojmë të fillojmë me bashkëpunimin me universitetin ‘ Luarasi’ mbi kërkimin shkencor, projektet shkencore dhe mundësinë për të vijuar më tej në fusha të tjera. Ne erdhëm këtu si miq, me qëllimin për të zhvilluar bashkëpunimin në fushën e arsimit. Ky është hapi i parë i bashkëpunimit dhe shpresojmë e besojmë se do të jetë frytdhënës në të ardhmen dhe shpresojmë të zhvillojmë programet e shkëmbimit të studentëve dhe të profesorëve”, nënvizoi Stanisic, i kënaqur për personat me universitetin dhe stafin akademik, me të cilin do të bashkëpunojë këtej e tutje. “Jemi të impresionuar nga zhvillimi i universitetit ‘ Luarasi’. Stafi akademik është shumë profesional dhe ne shpresojmë që të shkëmbejmë eksperiencat në të dyja drejtimet, për përfitime të përbashkëta për universitetet”. Ky nuk është i pari bashkëpunim që “Luarasi” ka me simotrat e tij në rajon, Europë e më gjerë. Falë partnerëve të shumtë, studentëve ekselentë që studiojnë në “Luaras” u është dhënë mundësia të shkëmbehen për një semestër apo një vit shkollimi në një tjetër universitet prestigjioz.