Balla: Kush është kundër Shengenit rajonal, s’kupton procesin e integrimit
“Kush është kundër Shengenit rajonal, nuk kupton procesin e integrimit europian”, tha dje kryetari i Grupit Parlamentar të PS- së, Taulant Balla, në Konferencën e 16- të parlamentare rajonale për Integrimin Europian të shteteve pjesëmarrëse në Procesin e Stabilizimit dhe Asociimit të Europës Juglindore. Kryetari i Grupit Parlamentar të PS- së, Taulant Balla, falënderoi vendet rajonale për solidaritetin që treguan me Shqipërinë pas tërmetit të 26 nëntorit. “Anëtarësimi në BE është e vetmja alternativë për rajonin tonë, e vetmja alternativë për paqen, për bashkëpunimin dhe për prosperitetin e shoqërive tona. Nga ana jonë, jemi duke punuar shumë për të mundësuar daljen tonë nga salla e pritjes dhe për vazhduar më tej rrugëtimin e gjatë në bashkësinë e vlerave, ideve dhe standardeve që ne aspirojmë. Po ashtu, Balla shtoi se “anëtarësimi në BE është e vetmja alternativë për rajonin tonë, e vetmja alternativë për paqen, për bashkëpunim dhe prosperitetin e shoqërive tona. Nga ana jonë jemi duke punuar shumë për të mundësuar daljen tonë nga salla e pritjes dhe për të vazhduar më tej rrugëtimin e gjatë në bashkësinë e vlerave, ideve dhe standardeve që ne aspirojmë”, u shpreh Balla. Në vijim të fjalës së tij, Balla tha se “e shoh të rëndësishme dhe jam besimplotë që Bashkimi Europian do ta respektojë premtimin e tij për integrimin e plotë të Ballkanit Perëndimor. Askush nuk duhet të jetë i kënaqur me një ‘ status quo’, i cili për rastin e rajonit tonë është i rrezikshëm. Krijimi i një hapësire boshe mund të mbushej nga aktorë të tjerë gjeostrategjikë, të cilët mund të kenë një impakt negativ në stabilitetin e rajonit tonë”. Sipas tij, “mesazhi ynë i përbashkët për BE- në duhet të jetë pikërisht ky: “BE të mbajë premtimin e dhënë ndaj rajonit të Ballkanit Perëndimor”. “Kjo daton qysh në 2003 me Konferencën e Selanikut dhe që akoma sot mbetet një proces i hapur për të gjitha vendet të rajonit tonë. Diskutimet e brendshme të BE- së për të ardhmen e procesit të zgjerimit, edhe pse të rëndësishme pasi mund t’i japin një impuls të ri zgjerimit, nuk duhet të nënkuptojë ndalimin, qoftë edhe të përkohshëm, të përgatitjes së vendeve që synojnë anëtarësimin në BE”, tha ai. “Shengeni rajonal, një ide e hedhur 15 vite më parë, është një domosdoshmëri historike sot, kur beteja e gjithë rajonit tonë është zgjerimi i hapësirës së lirisë së lëvizjes për njerëzit, mallrat, shërbimet dhe kapitalet. Kush është kundër Shengenit rajonal, nuk e kupton aspak procesin e integrimit europian. Të gjithë aktorët e përfshirë në vendimmarrje të gjejnë qartësinë e nevojshme politike dhe sensin gjeostrategjik për të vazhduar më tej rrugën e anëtarësimit të rajonit në BE”, theksoi ai.