Liroi ‘ të fortët’, Gjonaj kërkon hetim penal për gjyqtaren
Gazment Bardhi paralajmëron lirimin e të dënuarit Arben Grori
Ministrja e Drejtësisë, Etilda Gjonaj, reagoi dje për vendimin e lirimit të Endrit Dokles, duke e konsideruar si një vendim skandaloz dhe kërkoi nisjen e procedurave të shkarkimit të gjyqtares Enkeleida Hoxha.
Edhe më herët, tha Gjonaj, kemi ngritur shqetësimin për gjyqtaren në fjalë, duke rikujtuar edhe vendimin për lirimin e të dënuarit me burgim të përjetshëm, Genc Tafili. Gjonaj shtoi se në datën 15 janar i është drejtuar KLGJ- së për pezullimin e gjyqtares. "Si rezultat i shkeljeve të konstatuara dhe duke mbajtur parasysh se veprime të tilla, me pasoja të rënda në çështjet e rendit dhe sigurisë në vend, kanë krijuar zemërim të opinionit të gjerë publik, kanë cenuar rëndë paanshmërinë dhe objektivitetin në dhënien e drejtësisë, në datën 15 janar: I jam drejtuar Këshillit të Lartë Gjyqësor për pezullimin e menjëhershëm të gjyqtares nga detyra, si dhe marrjen e masave për shkarkimin e saj nga detyra si gjyqtare, me qëllim mostolerimin e asnjë vendimi të tillë, i cili sfidon haptazi procesin e reformimit të sistemit të drejtësisë dhe punën e përkushtuar të institucioneve të reja në këtë proces jetik për forcimin e shtetit të së drejtës", tha dje Gjonaj.
NDJEKJA PENALE
Në fjalën e saj, ministrja Gjonaj tha se kishte kërkuar hetimin penal të gjyqtares dhe përshpejtim të procedurave të rivlerësimit në kuadër të vetingut. "Njëkohësisht, i kam kërkuar institucionit të Prokurorisë ushtrimin e ndjekjes penale ndaj gjyqtares, jo vetëm për ndëshkimin e vendimmarrjeve abuzive, por edhe për parandalimin e fenomeneve të tilla me pasoja të rënda në besimin e qytetarëve te drejtësia. I jam drejtuar Komisionit të Pavarur të Kualifikimit dhe Operacionit Ndërkombëtar të Monitorimit për ndjekjen me prioritet të përshpejtuar të procesit të rivlerësimit kalimtar të gjyqtares, por edhe të të gjitha rasteve të tjera të ngjashme, mbi të cilët, në vite rëndojnë akuza të shumta publike për paligjshmëri dhe korrupsion", tha ministrja.
AKUZAT
Gjatë ditës së djeshme, sekretari i përgjithshëm i Partisë Demokratike, Gazment Bardhi, reagoi për vendimet e lirimit të personave të dënuar, duke bërë përgjegjëse qeverinë dhe konsideruar si "teatër" mosdijeninë e qeverisë se çfarë bëjnë drejtorët e tij apo gjyqtarët. Bardhi ndër të tjera tha se është duke u përgatitur edhe lirimi i një personi tjetër të dënuar me burgim të përjetshëm, ai i Arben Grorit. "Edi Rama dhe Etilda Gjonaj duhet t'u shpjegojnë shqiptarëve pse nuk reaguan menjëherë, pasi bosi i krimit Lulzim Berisha u lirua me garanci të Vangjush Dakos? Pse nuk e informojnë opinionin publik se janë në dijeni të plotë që po përgatitet edhe lirimi i bosit të krimit të organizuar Arben Grori?", tha Bardhi.