Gjykata dëgjon për 7 orë të arrestuarit për tërmetin
Gjykata e Tiranës zhvilloi dje seancën për vlerësimin e masës së sigurisë për 31 të arrestuarit pas hetimeve që u zhvilluan për pasojat e tërmetit. Seanca nisi në orën 12: 00 dhe pas përfundimit të të dyja palëve, gjyqtarja u tërhoq për të dhënë vendimin gjatë ditës së sotme. Ndërkohë që akuza pretendon se të arrestuarit kanë konsumuar veprat penale të “Falsifikimit të dokumenteve” dhe “Shpërdorim detyre”, ndërsa gjatë ditës së djeshme u kërkua “Arrest në burg” për disa prej të akuzuarve. Nga ana tjetër, një nga pretendimet e ngritura në seancën e zhvilluar me dyer të mbyllura nga avokatët gjatë mbrojtjes ishte edhe parashkrimet e veprave penale, edhe nëse do të ishin kryer. Duke iu referuar fjalës së prokurorit të çështjes Erjon Ymeri, shkeljet e konstatuara janë ndarë në dy kategori, shkelje të funksionarëve dhe ish- funksionarëve dhe të drejtuesve ligjorë e teknikë të objekteve të dëmtuara dhe të shpallura të pabanueshme. Sipas Prokurorisë, nga hetimi është gjetur se në dosjet për të cilat janë dhënë lejet, ka pasur “mungesë të theksuar në dokumentacion”. Nga studimi sizmologjik, i detyrueshëm për pallate banimi mbi 7 kate, e deri te aktet për qëndrueshmërinë e pallateve të ndërtuara. Ndërkohë, nga drejtuesit teknikë e ligjorë të ndërtesave është konstatuar se ka mungesa në dokumentacion sa i takon aktit të kolaudimit; në disa prej pallateve nuk është gjendur. Ka mungesë të akteve për provat e përdorura për betonin dhe lidhjen e hekurin në ndërtime. “Shkeljet të cilat dyshohet se kanë kryer personat funksionarë publikë të ish- komunave kanë të bëjnë me faktin se kanë miratuar leje ndërtimi në kundërshtim me ligjin dhe me mangësi të theksuara në dokumentacionin e nevojshëm për miratimin e lejes. Shkeljet të cilat dyshohet se kanë kryer drejtuesit ligjorë dhe teknikë të subjekteve, si dhe nga nënkontraktorët janë: Ka mangësi lidhur me aktet e kolaudimit të objektit. Në disa dosje të këtyre objekteve, nuk gjendet ky akt. Gjithashtu, në dosjen e këtyre objekteve ka mangësi në shumë akte”, pretendon Prokuroria.