Sejko: Të angazhuar për ruajtjen e stabilitetit financiar të vendit

Guvernatori i Bankës së Shqipërisë, Gent Sejko, ka shprehur angazhimin për ndjekjen e një politike monetare lehtësuese në përmbushjen e misionit të ruajtjes së qëndrueshmërisë së çmimeve të konsumit dhe stabilitetit financiar të vendit. Gjatë një takimi me ambasadorin e Norvegjisë në Shqipëri, Jens Erik Grøndahl, në ambientet e Bankës së Shqipërisë, Sejko u ndal në zhvillimet financiare në vend, duke vënë në dukje se sistemi bankar shqiptar është likuid, i kapitalizuar dhe me tregues të mirë rentabiliteti. Duke u ndalur tek ecuria ekonomike e vendit, Guvernatori Sejko theksoi se rritja ekonomike ka vijuar trendin pozitiv. Ndërkohë që ambienti i jashtëm makroekonomik mbetet sfidues, autoriteti monetar dhe institucionet e tjera në vend do të japin të gjithë kontributin e duhur për të mbështetur ruajtjen e parametrave makroekonomikë. "Banka e Shqipërisë ka ndjekur dhe do të vazhdojë të ndjekë edhe në periudhën në vijim një politikë monetare lehtësuese", tha Sejko. Nga ana e tij, ambasadori i Mbretërisë së Norvegjisë shprehu vlerësimet e tij për kontributin e rëndësishëm që Banka e Shqipërisë jep në ruajtjen e stabilitetit makroekonomik të vendit. Jens Erik Grøndahl theksoi rëndësinë e zbatimit të reformave ekonomike e strukturore dhe vlerësoi progresin e bërë nga Shqipëria vitet e fundit në këtë drejtim. Zbatimi i mëtejshëm i reformave në përputhje me standardet europiane do të ndikojë pozitivisht në hapjen e negociatave me Bashkimin Europian, si dhe në krijimin e një ambienti tërheqës për investitorët e huaj. Në fund të takimit, Guvernatori Sejko vlerësoi rëndësinë e investimeve norvegjeze të deritanishme në Shqipëri në drejtim të punësimit dhe rritjes ekonomike duke shprehur angazhimin e përbashkët për rritjen e mëtejshme të bashkëpunimit ekonomik midis dy vendeve, si dhe në rritjen e investimeve të huaja në Shqipëri, në sektorë si ai i turizmit, bujqësisë, minierave etj.