SI NDRYSHON LIGJI
Legalizimet, procedurë e re për të marrë tapinë
Pas ngërçit me pagesat, Qeveria do ndryshojë ligjin për legalizimin e shtëpive. Gazeta zbardh procedurën që do ndjekin familjet për të marrë tapinë
Për të marrë lejen e legalizimit, duhet që qytetarët të kryejnë fillimisht pagesën e taksës së ndikimit në infrastrukturë, një tarifë kjo që vilet nga Kadastra, por që shkon për llogari të njësive të qeverisjes vendore.
NISMA
Pas shqetësimit të ngritur disa muaj më parë, Agjencia e Kadastrës ka kaluar në hapa konkretë. Sipas një raporti të Agjencisë së Trajtimit të Pronave, dorëzuar Ministrisë së Drejtësisë, mësohet se ASHK ka dorëzuar në qeveri një draft në të cilin kërkon që leja e legalizimit të mos kushtëzohet nga pagesa e taksës së ndikimit në infrastrukturë. "Drejtoria e Përgjithshme e ASHK- së ka dorëzuar projektakt për përmirësimin e kuadrit ligjor për legalizimin e ndërtimeve pa leje, duke shfuqizuar normën ekzistuese ligjore në lidhje me kohën ( momentin) e vjeljes së taksës së infrastrukturës", thuhet në raport. Në fillim të vitit që shkoi, Kadastra shprehte shqetësimin se mbledhja e kësaj takse do të ngadalësonte procesin e legalizimit. Edhe në raportin e Agjencisë së Pronave vihet në dukje po ashtu një gjë e tillë, ku përmenden edhe procedurat që ndiqen hap pas hapi deri në marrjen e tapisë, të cilat bëhen shkak për vonesa. "Si pasojë e ndryshimeve ligjore qe solli miratimi i ligjit nr. 95/ 2018, dt. 03.12.2018, "Për disa ndryshime dhe shtesa në ligjin Për sistemin e taksave vendore", ndikoi drejtpërdrejt në pamundësinë për të realizuar objektivat politikë dhe administrativë, që lidhen me procesin e legalizimit. Konkretisht, në objektivat e parashikuar për vitin 2019, ishte parashikuar 25,000 numri i lejeve të legalizimit, por si pasojë e ndryshimeve ligjore, miratimi i lejes së legalizimit nga Kadastra kushtëzohet nga 6 hapa procedurale, që varen nga njësitë e vetëqeverisjes vendore dhe nga vetë subjekti i interesuar. Kadastra duhet të njoftojë bashkinë për ndërtimin informal që legalizohet, bashkia me marrjen e njoftimit duhet të llogarisë vlerën e taksës së ndikimit në infrastrukturë dhe t'i njoftojë subjektit aplikues për legalizim, vlerën e taksës. Pas njoftimit, subjekti duhet të paguajë taksën dhe të dorëzojë pranë Kadastrës vërtetimin për shlyerjen e saj. Si rrjedhojë, normativa mujore programohet të jetë 8001.000 leje, duke bërë që numri i pritshëm për vitin 2019 të jetë 10 mijë leje", thuhet më tej në raportin e Agjencisë së Pronave.
RAPORTI
Edhe në raportin e fillimvitit që shkroi Agjencia e Kadastrës, ngriti si shqetësim uljen e numrit të lejeve të lëshuara, për shkak të këtij kushti të caktuar rishtazi. "Ky amendim i ligjit, i cili shton hapat proceduralë të miratimit të lejes së legalizimit, pritet të ndikojë ndjeshëm në kohën e përmbylljes së procesit administrativ, duke kushtëzuar miratimin e lejes me veprimtarinë e vetëqeverisjes vendore, si edhe vullnetin e vetë subjekteve mbi shlyerjen në kohë të detyrimeve financiare, që vijnë si pasojë e aplikimit të kësaj takse. Si rrjedhojë pritet që normativa mujore të ulet në 8 00 deri në 1 mijë leje në muaj, çka do të sjellë edhe uljen e numrit të pritshëm të lejeve të legalizimit për vitin 2019 me rreth 10 mijë", thuhej në raport.