Shkojnë për t’i grabitur, maskat qëllojnë me armë çiftin e biznesmenëve pas përplasjes brenda shtëpisë
NGJARJA DJE NE MBREMJE NE TIRANE, ÇIFTI, RENDE NE SPITAL PAS PLUMBAVE
Një plagosje me armë zjarri tronditi mbrëmjen e së dielës Tiranën.
Zyrtarisht, Policia njoftoi se një çift bashkëshortësh ishin plagosur nga dy persona të paidentifikuar, që dyshohet se kanë hyrë për të grabitur. Ngjarja e rëndë ka ndodhur në banesën e çiftit në Allias, ndërsa Policia tha se janë ngritur pika kontrolli në zonën përreth. Deri në orët mbrëmjes së djeshme, identifikimi i dy personave që kanë hyrë në banesë nuk u bë e mundur, ndërsa hetimet janë përqendruar në ndonjë gjurmë që mund të kenë lënë atje. Burime konfirmuan dje se personat që ranë pre e grabitjes janë çifti Afërdita dhe Petrit Laze, të cilët janë pronarë edhe të një furrë buke pranë banesës së tyre.
NGJARJA
Sipas burimeve zyrtare, ngjarja ndodhi rreth orës 21: 40, kur çifti Laze ka dëgjuar që në banesën e tyre ka hyrë dikush. Pasi personat janë konstatuar nga bashkëshortët, njëri prej tyre ka qëlluar, duke i lënë të plagosur. "Rreth orës 21: 40, në rrugën ' Njazi Meka', 2 persona ende të paidentifikuar kanë hyrë në banesën e çiftit të bashkëshortëve P. L dhe A. L. Në momentin që janë konstatuar nga çifti i bashkëshortëve njëri prej personave ka qëlluar me armë zjarri në drejtim të çiftit. Si pasojë janë plagosur çifti i bashkëshortëve P. L dhe A. L, të cilët u dërguan në spital për ndihmë mjekësore", njoftoi zyrtarisht Policia e Shtetit. Më tej, blutë thanë se janë ngritur pika kontrolli për krehjen e zonës, ndërsa hetimet do të ndiqen nga Prokuroria e Tiranës. "Policia ka shkuar në vendngjarje dhe ka ngritur pika kontrolli. Vijon krehja e zonës me qëllim identifikimin dhe kapjen e autorëve. Grupi hetimor vijon punën për sqarimin e mëtejshëm të rrethanave të ngjarjes", tha dje Policia. Mësohet se në banesë janë gjetur orendi të rrëzuara dhe kjo ka ardhur si pasojë e përleshjes së çiftit me grabitësit, ndërsa mësohet se në Komisariatin Nr. 4 janë shoqëruar disa persona për t'u marrë në pyetje.
ÇIFTI
Petrit dhe Afërdita Laze u transportuan në Spitalin e
Traumës, kur gjatë mbrëmjes së djeshme iu nënshtruan ndërhyrjeve kirurgjikale. Mësohet se Afërdita ka marrë një plumb në kofshë dhe është në gjendje më të mirë, ndërsa Agim Laze ka marrë një plumb në bark dhe ndodhet në gjendje më të rëndë. Ata mësohet se janë nga Skrapari dhe prej vitesh jetojnë në Tiranë, ku ushtrojnë aktivitetin e tyre. Çifti Laze janë prindër të dy fëmijëve, një djali dhe një vajze.