Kulla e re 100 m e lartë, PD akuzon Veliajn
Veliaj dëmton shëndetin e qytetarëve dhe mbush xhepat e oligarkëve
Partia Demokratike akuzon kryetarin e Bashkisë së Tiranës se po betonizon kryeqytetin, në një kohë që raportet ndërkombëtare tregojnë se niveli i ndotjes së ajrit është shumë i lartë. Zëdhënësja e Partisë Demokratike, Ina Zhupa, publikoi dje dokumentet e lejes së ndërtimit në bulevardin "Gjergj Fishta" në kryeqytet, ku është projektuar të ngrihet një objekt 100 metra i lartë, shumëfunksional, për banim, zyra dhe qendër tregtare. Dokumenti mban firmën e Kryeministrit Rama, ministres Balluku dhe kategorizohet si një dokument i rregullores së veçantë. "Erion Betoni vazhdon betonizimin e Tiranës me kulla të larta, pavarësisht se jemi qyteti me ajrin më të ndotur në Europë dhe të dëmshëm për shëndetin. E radhës është kulla që do t'i zërë vendin ishEkspozitës, një sipërfaqe ndërtimi 67.366 m2 me 24 kate lartësi. Këshilli Kombëtar i Territorit, me vendimin nr. 4, datë 8 nëntor 2019, ka miratuar lejen e ndërtimit të radhës për objektin ' Ekspozita Building', një kullë me lartësi rreth 100 metra, 24 kate mbi tokë, me destinacion qendër tregtare, ambiente për zyra dhe banim dhe 5 kate nën tokë parking. Volumi i sipërfaqes së përgjithshme të ndërtimit që do t'i zërë frymën kryeqytetit është 67.366 m2", shkroi zëdhënësja e PD- së, Ina
Zhupa. Më tej, zëdhënësja e PD- së akuzon kryebashkiakun Veliaj se dëmton vlerat historike të qytetit dhe mendon vetëm për të pasuruar oligarkët. "Trualli ku do të ndërtohet kulla ndodhet pranë bulevardit ' Gjergj Fishta', ku më parë ka ekzistuar ndërtesa ' Ekspozita sot', një ndërtesë e trashëgimisë historike të Tiranës. Veliaj vetëm dëmton qytetin dhe shëndetin e qytetarëve dhe mbush xhepat e oligarkëve e të vetët. I emëruar në krye të bashkisë, nuk po lë hapësirë në qytet pa e transformuar në një kullë", vijoi Zhupa.
NDOTJA
Kryeqyteti i Shqipërisë vijon të jetë një ndër vendet më të ndotura të Europës. Pak muaj më parë, indeksi i ndotjes, i cili përllogaritet nga Numbeo, portali më i madh i të dhënave mbi cilësinë e jetës, tregoi se ndotja në Tiranë ishte më e lartë në 2019, duke shënuar 83.72 pikë, nga 82.8 që përllogaritej në fillim të këtij viti. Numbeo vlerësoi se Tirana është kryeqyteti më i ndotur i Europës dhe i treti si qytet, pasi në vend të parë renditet qyteti i Tetovës në Maqedoni dhe Chelyabinsk në Rusi. Përkeqësimi i nivelit të ndotjes në Tiranë sjell edhe uljen e cilësisë së jetës për ata që jetojnë në kryeqytet, apo që po mendojnë të shpërngulen në Tiranë.