Meta: Historia e Kosovës i ka themelet te Rugova
"Vizioni i tij për Kosovën demokratike është shembull frymëzimi"
Presidenti Meta, gjatë vizitës së tij në Kosovë, ka bërë homazhe në varrin e ish- Presidentit të Kosovës, Ibrahim Rugova, dhe gjithashtu është takuar me familjarët e këtij të fundit. Në disa foto të publikuara në rrjetet sociale, ku nderon ishPresidentin Rugova në vendprehje, Meta thekson edhe rëndësinë që ky personalitet pati për historinë e Kosovës dhe të të gjithë shqiptarëve. Sipas kreut të shtetit shqiptar, vizioni i Rugovës për Kosovën si një shtet i pavarur demokratik dhe në fqinjësi të mirë, janë ende modeli dhe shembulli që duhet të kenë parasysh politikanët në Prishtinë. Për Metën, vetë historia e Kosovës moderne dhe e shqiptarëve i ka themelet në veprën që Ibrahim Rugova la pas. "Me respekt e mirënjohje të thellë, u përula me nderim para memorialit të Presidentit historik të Kosovës, dr. Ibrahim Rugova. Vizioni i Tij euroatlantik për Kosovën, kontributet e jashtëzakonshme për paqe, liri, demokraci, për fqinjësi e bashkëjetese në rajon janë shembuj frymëzimi, përherë aktuale. Historia e re e Kosovës dhe e kombit shqiptar ka në themelet e veta emrin dhe veprën e ndritur të Presidentit Rugova", shkruan Meta në postimin e tij në rrjetet sociale. Pas homazheve në varrin e Rugovës, Presidenti Meta zhvilloi edhe një takim me familjarët e tij, ku shprehu mirënjohjen e popullit shqiptar për gjithë punën dhe veprën që la pas ish- Presidenti Kosovës. "Përherë kënaqësi të takoj në Prishtinë familjen e dashur dhe të respektuar të Presidentit historik të Kosovës, dr. Ibrahim Rugova. Në bisedën e ngrohtë dhe shumë miqësore ndamë plot kujtime të shtrenjta për angazhimin jetësor të Presidentit Rugova për Kosovën Republikë, në paqe, të lirë, të pavarur e demokratike, me orientim të qartë properëndimor, në bashkëpunim e fqinjësi të mirë në rajon", shkroi Presidenti. Këto vizita, Presidenti Meta i zhvilloi në kuadër të qëndrimit të tij dyditor në Kosovë. Më herët gjatë ditës së shtunë, ai mori pjesë në Akademinë Solemne "Faleminderit Shqipëri", e organizuar nga Ipeshkvi i Dioqezës Prizren- Prishtinë, Imzot Dodë Gjergji, në kujtim dhe nderim të solidaritetit të jashtëzakonshëm mbarëkombëtar, ndaj shqiptarëve të shpërngulur forcërisht nga ushtria serbe gjatë Luftës së Kosovës, në vitet 1998- 1999.