Mustafa: Nëse s'ka koalicion, Kurti të gjejë zgjidhje tjetër
"Tani takohem me Albin Kurtin vetëm për nënshkrim koalicioni"
Kreu i LDK- së, Isa Mustafa, e ka bërë të qartë se oferta më e mirë e tij për një koalicion me Vetëvendosjen është ajo e fundit dhe se nuk do të ofrojë asnjë tjetër, duke i dërguar mesazhin Albin Kurtit se nëse nuk do ta pranojë atë, nuk do të ketë koalicion mes tyre.
Mustafa tha se Lëvizja Vetëvendosje duhet të gjejë zgjidhje tjetër nëse nuk i pranon kërkesat e LDK- së si parti e dytë. Edhe pse e mbështet idenë e një koalicioni me Vetëvendosjen, kreu i LDKsë u shpreh se nuk do të ketë takime të tjera me Albin Kurtin nëse s'ka pajtim për arritjen e një marrëveshjeje. "A do të ketë takim apo jo varet se sa do të jetë gatishmëria për të bërë marrëveshje. Unë nuk jam që të ketë takime sa për t'u takuar, por takim për të lidhur marrëveshjen. Për gjëra të tjera jemi shprehur qartë në organet tona. Ne e kemi pasur opsion këtë koalicion dhe mbesim pranë këtij koalicioni nëse bëhet mirë. Nëse jo, Vetëvendosje duhet të gjejë zgjidhje tjetër", tha Mustafa të dielën në "RTV21". Albin Kurti i ka kthyer një përgjigje me letër kreut të LDK- së, të cilën ai e quajti si një ese ideologjike dhe nuk e pranoi si përgjigje zyrtare. Kurti ka thënë në letër se nuk mund të plotësojë një nga kërkesat kryesore të Mustafës, që është posti i kryeparlamentarit të premtuar më parë për këtë parti, pasi tashmë atë e mban një anëtar i Vetëvendosjes, i cili u votua në Kuvend. Kurti e ka quajtur kërkesë që i përket një monarkie absolute të një shekulli tjetër atë të Mustafës për të shkarkuar Glauk Konjufcën nga posti i kryeparalamentarit. Por Mustafa është përgjigjur se oferta që ai ka dhënë për Vetëvendosjen është e fundit që del nga LDK- ja dhe nëse nuk do të merren vesh në këtë pikë, topi mbetet në fushën e Kurtit. Albin Kurti nuk ka shkuar as në Presidencë për të dhënë emrin e mandatarit për formimin e Qeverisë, pasi piste një saktësim të koalicionit me LDK- në për të shkuar i qartë te Presidenti. Nga ana e tij, kreu i shtetit të Kosovës ka kërkuar me ngulm që Kurti të shkojë sa më parë për të dorëzuar emrin e mandatarit, një proces që më pas i jep atij vetëm 15 ditë kohë për të formuar qeverinë. Thaçi ka tentuar tri herë të njëpasnjëshme para fundvitit për t'i dhënë Kurtit mandatin, si dhe disa herë pas 6 janarit këtë vit, lëvizje që janë komentuar nga kritikët e tij edhe si nxitje politike në përpjekje për të eliminuar Kurtin nga mandatimi. Të dielën, Hashim Thaçi tha se po planifikon ta mandatojë fituesin e zgjedhjeve edhe nëse s'i çon emrin në Presidencë. Ndërkohë, kanë kaluar 105 ditë prej kur u mbajtën zgjedhjet dhe Vetëvendosje doli fituese. 24 ditë kanë kaluar prej se është votuar Kryetari i Kuvendit dhe është hapur mundësia e votimit për Qeverinë e Kosovës. Dy liderët e partive, VV dhe LDK, kanë ndërprerë takimet për më shumë se një javë dhe komunikimin e vetëm publik e kanë bërë me shkëmbimin e dy letrave, të cilat përmbajnë ofertat e njëra- tjetrës se si të formohet qeveria. Deri më tash, VV dhe LDK kanë dështuar ta arrijnë marrëveshje.