Pensionet, përfituesit e shtesës së re për janarin
Zbardhen vendimet e ISSH për janarin me tri kategoritë e pensionistëve që marrin shtesën. Emrat e përfituesve deri në 5 mijë lekë/ muaj në Tiranë e çdo qytet
Vetëm përgjatë këtij muaji, Instituti i Sigurimeve Shoqërore ka përfunduar llogaritjen për 1800 pensionistë, duke e çuar në 6600 në total numrin e përfituesve.
Gazeta publikon emrat e minatorëve, naftëtarëve dhe metalurgëve, të cilëve iu është llogaritur rritja dhe që mund ta tërheqin atë në pikat përkatëse të shpërndarjes.
KATEGORITË
Nga skema suplementare përfitojnë të gjithë ata që kanë ushtruar profesione të konsideruara si të vështira dhe shumë të vështira. Shtesa, sipas ligjit të zyrtarizuar në korrik të vitit që shkoi, llogaritet mbi bazën e kontributeve dhe varion mesatarisht nga 3 deri në 5 mijë lekë për çdo pensionist. Duke qenë se ka ende paqartësi mbi kategoritë përfituese, ISSH ka bërë me dije se nga shtesa përfitojnë të gjithë ata që kanë punuar si vagonistë, zjarrmëtarë në nëntokë, makinist i sharrave prerëse në nëntokë; pompist i brendshëm në nëntokë etj. Në industrinë e naftës dhe gazit përfshihen punë të vështira dhe shumë të vështira, konkretisht: saldator dhe elektrosaldator në rezervuar, punëtor i pastrimit të brendshëm të rezervuarëve, depove dhe cisternave të naftës. Gjithashtu, si punë e vështirë në industrinë e naftës konsiderohet edhe puna e personelit inxhiniero- teknik të naftës, kur kanë punuar e drejtuar drejtpërdrejt sektorë të shpim- kërkimit e shpimshfrytëzimit, si edhe sektori i nxjerrjes së naftës dhe të gazit. Ndërsa në metalurgji, si punë të vështira klasifikohen punëtorët e shkrirjes dhe derdhjeve të metalit, punët shumë të vështira në metalurgjinë e zezë e ferrokrom, si p. sh. në uzinën e petëzimit, në uzinën e gizës, në repartin e pjekjes, në uzinën e çelikut etj.
APLIKIMET
Procesi i aplikimeve nuk është i limituar. Kjo do të thotë që pensionistët nga radhët e minatorëve, naftëtarëve dhe metalurgëve mund të paraqiten në çdo moment në zyrat e ISSH për të dorëzuar kërkesë. Drejtori i këtij institucioni, Astrit Hado, tha pak ditë më parë se për të gjitha aplikimet e depozituara që prej muajit shtator të vitit që shkoi e deri më tani, llogaritja do të përfundojë brenda 2 muajve të ardhshëm.