Legalizimet, lista me emrat e 1480 familjeve që marrin hipotekën në Tiranë dhe pesë qarqe

Një pjesë e familjeve kanë detyrimin për të paguar taksën

Agjencia Shtetërore e Kadastrës ka publikuar dje emrat e 812 familjeve që kanë gati lejen e legalizimit dhe mund të paraqiten pranë sporteleve të agjencisë për ta tërhequr atë.

Krahas tyre janë publikuar edhe emrat e 671 qytetarëve që kanë detyrimin për të shlyer taksën e ndikimit në infrastrukturë. Pra, në total, janë rreth 1480 përfitues të shpërndarë në disa qytete, përkatësisht Tiranë, Fier, Lezhë, Berat, Shkodër dhe Pogradec. Gazeta boton sot një pjesë të listës për të vijuar edhe nesër me pjesën e mbetur.

MARRJA E TAPISË

Për familjet që kanë gati lejen, nisin menjëherë praktikat e regjistrimit për marrjen e tapisë. Ligji i ri parashikon një afat 60- ditor për përmbylljen e këtyre procedurave. "ASHK, brenda 60 ditëve nga përfundimi i procedurave të kualifikimit, legalizon ndërtimin, duke respektuar dispozitat e legjislacionit në fuqi për regjimet pasurore martesore. Poseduesi i ndërtimit pa leje ka të drejtë të kërkojë kryerjen e procedurave të legalizimit brenda 30 ditëve, kundrejt pagesës së një tarife shërbimi shtesë", specifikohet më tej në ligjin e ri.

TARIFA

Taksa e ndikimit në infrastrukturë është parakusht për marrjen e lejes. Mësohet se Agjencia e Kadastrës ka dorëzuar në Qeveri një draft, në të cilin kërkon që leja e legalizimit të mos kushtëzohet nga pagesa e taksës së ndikimit në infrastrukturë. "Drejtoria e Përgjithshme e ASHK- së ka dorëzuar projektakt për përmirësimin e kuadrit ligjor për legalizimin e ndërtimeve pa leje, duke shfuqizuar normën ekzistuese ligjore në lidhje me kohën ( momentin) e vjeljes së taksës së infrastrukturës", thuhet në raport. Në mënyrë të vazhdueshme, ky institucion ka ngritur shqetësimin se mbledhja e kësaj takse ngadalëson procesin e legalizimit duke ulur numrin e lejeve të emetuara.