Pëllumbi flet për Kuvendin me 122 deputetë, Ruçi: Sfidë negociatat
“Sfida e këtij Parlamenti është puna për të afruar sa më shpejt hapjen e negociatave”
Në kuadër të 100vjetorit të mbajtjes së Kongresit të Lushnjës, që shënon edhe përvjetorin e 100- të të parlamentarizmit shqiptar, kreu i Kuvendit, Gramoz Ruçi, dhe një pjesë e madhe e deputetëve ishin dje në Lushnjë për të marrë pjesë në festimet e organizuara.
Në fjalën e tij, Ruçi vuri theksin te rëndësia e madhe që ka kjo datë dhe kjo ndërtesë për historinë e shtetit modern shqiptar, duke e radhitur atë pas 28 Nëntorit të 1912- ës. “Rrallë gjendet në histori një shtëpi me kaq kontribute në historinë e një vendi. Shteti i shqiptarëve deri në shpalljen e pavarësisë kishte qenë një planet i largët për shqiptarët. Por edhe pas shpalljes së pavarësisë, shteti rrezikonte të zhdukej e bashkë me të edhe Shqipëria. Nga kjo shtëpi dhe nga ky kongres nisi konsolidimi i Shqipërisë së pavarur e parlamentare. Nga kjo shtëpi dhe nga ky kongres nisi diplomacia shqiptare në mbrojtje të tërësisë territoriale dhe integritetit të Shqipërisë. Nga kjo shtëpi dhe nga ky kongres nisi ndërtimi i administratës shqiptare, arsimit, shkollave dhe forcave të rendit. Në vitet e para të jetës parlamentare çelën filizat e parë të pluralizmit demokratik. Sot, një shekull pas kësaj vepre themeltare për kombin dhe shtetin shqiptar, le të shprehim mirënjohjen tonë për veprën monumentale të delegatëve të Kongresit të Lushnjës”, u shpreh Ruçi. Përveç festimeve në Lushnjë, dje u zhvillua dhe Konferenca Shkencore kushtuar 100- vjetorit të themelimit të parlamentarizmit shqiptar në kryeqytet. Në këtë veprimtari, ku morën pjesë ish- drejtues të Kuvendit, të grupeve parlamentare dhe të qeverive të Shqipërisë, deputetë dhe ishdeputetë, Ruçi theksoi se puna kryesore e Parlamentit është hapja e negociatave me BE- në dhe një kryesim dinjitoz i presidencës së OSBE- së. “Në përfundim të Luftës së Parë Botërore, tri nga gjashtë Fuqitë e Mëdha europiane vendosën të ricopëtonin Shqipërinë. Kombi shqiptar u ndodh në një nga udhëkryqet më të vështira të ekzistencës së tij. Kishte ardhur ora e rizgjimit, e mobilizimit të energjive për shpëtim kombëtar. Kësaj thirrjeje iu përgjigj pararoja e ndërgjegjes kombëtare, burrat prijës atdhetarë. Këta burra, në 21 janar 1920, u mblodhën në Kuvendin Kombëtar të Lushnjës dhe morën vendime të mëdha historike për të mos lejuar copëtimin e mëtejshëm të trungut kombëtar. Ata përsosën dhe plotësuan vendimet e Kuvendit Kombëtar të Vlorës. Parlamentet e gati 30 viteve të Shqipërisë pluraliste e demokratike kanë dhënë kontribute të çmuara në ndërtimin e forcimin e rendit demokratik, të shtetit ligjor, qeverisjes së mirë dhe në luftën kundër krimit të organizuar e korrupsionit. Në këtë 100- vjetor të parlamentarizmit, dëshiroj të shpreh mirënjohjen time dhe të Kuvendit të sotëm të Shqipërisë për veprimtarinë dhe kontributin e të gjithë parlamentarëve shqiptarë në zhvillimin, përparimin e demokratizimin e Shqipërisë. Kuvendi i Shqipërisë do vazhdojë të punojë me përkushtim për të afruar sa më shpejt të jetë e mundur hapjen e negociatave për anëtarësimin e plotë në Bashkimin Europian. Një detyrë tepër të rëndësishme ka Kuvendi ynë gjatë vitit që sapo nisi. Shqipëria sapo ka marrë kryesinë e radhës të OSBE- së për vitin 2020”, tha Gramoz Ruçi.