BE, rezerva për “Antishpifjen”: Tani të ndryshohet ligji
OSBE: Projektligji për shpifjen ka nevojë për përmirësime të mëtejshme
Pavarësisht se maxhoranca thotë se dy projektligjet që përmbajnë Paketën Antishpifje janë të konsultuara me ekspertët e OSBE- së dhe BE- së, këta të fundit kanë rezerva për draftet e miratuara në Parlament në seancën e fundit të dhjetorit.
Bashkimi Europian i bëri thirrje Parlamentit shqiptar që të shfrytëzojë mundësinë e qw jep kthimi nga Presidenti i Paketës Antishpifje dhe të marrë në konsideratë rekomandimet e Këshillit të Europës. Thirrja erdhi nga zëdhënësja e Komisionit, Ana Pisonero. "Ne e kemi bërë të qartë se Bashkimi Europian mbështet rekomandimet e Këshillit të Europës në lidhje me ligjin e medias në Shqipëri. Ne pranojmë se shqetësimet dhe rekomandimet përkatëse janë sërish të vlefshme dhe për ne ato duhen adresuar. Fakti që Presidenti i Shqipërisë e ka kthyer ligjin në Parlament, përbën një shans për t'i pranuar rekomandimet. Shpresojmë që kjo të realizohet", tha Pisonero. Zëdhënësja listoi edhe disa prej rekomandimeve që Komisioni pret nga një vend kandidat. "Absolutisht që ne e mbështesim vetërregullimin. Ne mbështesim disa rekomandime të Këshillit të Europës, jo vetëm për nxitjen e vetërregullimit. Gjithashtu, mbështesim rekomandimin që rregullimi të kufizohet vetëm në shërbimet e mediave audiovizive online, si dhe trajtimin e pavarur gjyqësor të ankesave në lidhje me mediat dhe forcimin e transparencës për pronësinë e mediave në vend. Pra, në përgjithësi, ne mbështesim të gjitha rekomandimet e parashtruara nga Këshilli i Europës. Ato janë në përputhje me pritshmërinë tonë, me atë që duhet ndjekë një vend kandidat", tha zëdhënësja. Edhe OSBE vijon të ketë të njëjtat rezerva. Kryetari i prezencës së OSBE- së, Bernd Borchardt, tha dje gjatë një aktiviteti në kryeqytet, se sipas përfaqësuesit të OSBEsë për lirinë e medias, Paketa e Antishpifjes ka nevojë për përmirësim. "Një rekomandim tjetër është ai për dekriminalizimin e shpifjes, pra, heqjen e saj nga Kodi Penal. Po ashtu, përqendrimi i pronësisë në media, në sektorin e transmetimeve, duhet të kufizohet. Ky është një ndër rekomandimet e papërmbushura. Përfaqësuesi i OSBE- së për Lirinë e Medias, ka rekomanduar që projektligji për shpifjen ka nevojë për përmirësime të mëtejshme", tha Borchardt. Paketa Antishpifje, ligjet "Për mediat audiovizive" dhe "Për komunikimet elektronike", u votuan nga Parlamenti në seancën e fundit të legjislaturës së kaluar dhe u kthyen për rishqyrtim nga Presidenti Ilir Meta më 12 janar të këtij viti.