Trump: Marrëveshja Kosovë- Serbi, një tjetër fitore
BE e mësoi nga mediat, marrëveshja “eliminon” taksën e Haradinajt
Presidenti amerikan, Donald Trump, ka reaguar personalisht pas arritjes së marrëveshjes për rikthimin e linjës së fluturimeve mes Kosovës dhe Serbisë, për herë të parë pas 21 vitesh. Këtë sukses ai ia ka atribuuar administratës që udhëheq. “Të gjithë thanë se nuk mund të bëhet. Por, për herë të parë në një gjeneratë, do të ketë fluturime direkte mes Serbisë dhe Kosovës. Një tjetër fitore. Falënderime për ambasadorin Robert O’Brien dhe ambasadorin Richard Grenell”, ka shkruar Trump në “Twitter”. Marrëveshja për fluturime direkte u nënshkrua të hënën në Berlin, pas ndërmjetësimit amerikan. Richard Grenell, emisari i Presidentit të SHBA- së në bisedimet Kosovë– Serbi, ia ka dalë t’i shtyjë të dyja shtetet drejt një marrëveshjeje për hapjen e një linje ajrore, për herë të parë pas 21 vitesh. Marrëveshja është përshëndetur në Kosovë dhe rajon. Grenell ia ka atribuuar suksesin Presidentit Donald Trump. “Presidenti Donald Trump edhe një herë na çoi në një fitore historike. Kosova dhe Serbia sot nënshkruan një marrëveshje për fluturimet e para direkte midis Prishtinës dhe Beogradit pas 21 vitesh. Faleminderit ‘ Lufthansa’, NATO, Robert C. O’Brien dhe liderët e Kosovës dhe Serbisë”, ka shkruar Grenell, i cili më 23 janar do të vizitojë Kosovën. Marrëveshja u arrit në kryeqytetin gjerman ku janë duke qëndruar zyrtarë të lartë të administratës amerikane në Konferencën për Libinë, përfshirë Sekretarin e Shtetit Mike Pompeo dhe këshilltarin për Siguri Kombëtare të Presidentit Trump, Robert O’Brien. Ambasadori amerikan në Prishtinë, Philip Kosnett, përmes një postimi në “Twitter”, tha se Trump dhe ekipi i tij kanë punuar shumë për këtë marrëveshje. Sipas tij, ky është vetëm fillimi i një të ardhmeje të ndritur për kosovarët dhe serbët. “Presidenti
Trump dhe ekipi i tij kanë punuar shumë për ta arritur këtë marrëveshje, që është vetëm fillimi i një të ardhmeje të ndritur për shokët tanë në Kosovë dhe Serbi. Ky hap është një fitore për regjionin. Faleminderit ambasadorit Grenell për lidershipin e tij”, ka shkruar Kosnett. BE E MËSOI NGA MEDIAT Bashkimi Europian ( BE), i cili ndërmjetëson dialogun mes Kosovës e Serbisë për normalizim të marrëdhënieve, nuk ka qenë i përfshirë në procesin e rikthimit të fluturimeve mes Kosovës e Serbisë. Sipas “Europa e Lirë”, burime të mirinformuara brenda institucioneve europiane kanë konfirmuar se zyrtarët europianë kanë mësuar përmes mediave për këtë marrëveshje dhe janë befasuar nga informacioni. Të hënën, një ditë pas nënshkrimit të marrëveshjes, zëdhënësi i shefit të diplomacisë europiane, Peter Stano, bëri një koment të shkurtër për natyrën “komerciale” të kësaj marrëveshjeje, por vetëm duke iu përgjigjur pyetjes së një gazetari në një konferencë të përditshme për shtyp. Stano, që është zëdhënës i përfaqësuesit të lartë të BE- së, Joseph Borell, i cili në shumë raste ka deklaruar se do të angazhohet personalisht në dialogun mes Kosovës e Serbisë, e ka vlerësuar marrëveshjen si “sinjal pozitiv”. “BE- ja mbështet të gjitha lidhjet në rajon që forcojnë komunikimin e njerëzve mes Serbisë e Kosovës. Kjo është një prej mënyrave si të përparohet drejt normalizimit të marrëdhënieve mes Beogradit e Prishtinës”, deklaroi Stano, duke shtuar se hapja e linjës komerciale nuk do të ndikojë apo ndryshojë qëndrimin e BE- së ndaj statusit të Kosovës. MARRËVESHJA “HEQ” TAKSËN NDAJ SERBISË “Gazeta Express” e ka siguruar të plotë dokumentin për fluturimet, që obligon Kosovën të heqë taksën ndaj Serbisë të vendosur nga Kryeministri Haradinaj në nëntor të vitit 2018. Dokumenti, i cili nga ana kosovare në ceremoninë në Berlin është nënshkruar nga zyrtari i Autoritetit të Aviacionit Civil të Kosovës, përveç firmës së Grupit “Lufthansa”, mban edhe firmat e Aeroportit të Prishtinës dhe Komandantit të KFOR- it, thekson se lëvizja në relacionin Prishtinë - Beograd do të realizohet në përputhje me marrëveshjen e arritur në Bruksel të njohur si IBM, që siguron lëvizje vetëm me letërnjoftime. “Marrëveshjet për Lirinë e Lëvizjes dhe Marrëveshja për Menaxhimin e Integruar të Kufirit, të arritura gjatë dialogut mes Beogradit dhe Prishtinës, do të zbatohen për pasagjerët, postën dhe mallrat që transportohen përmes kësaj linje ajrore”, thuhet në dokument. Po ashtu, theksohet se “Autoriteti i Aviacionit Civil në Kosovë dhe Aeroporti i Prishtinës konfirmojnë se operimi për në/ nga Beogradi/ Prishtina dhe anasjelltas do të funksionojë pa taksa shtesë dhe taksa për një shërbim në linjën BPSAR”. Pikërisht ky është edhe provizioni që kërkon heqjen e taksës 100 për qind ndaj mallrave të Serbisë, që e kishte vendosur Kryeministri Ramush Haradinaj në nëntor të vitit 2018. Pala serbe, menjëherë pas publikimit të lajmit se është arritur marrëveshja, ka bërë me dije se ajo nuk do të funksionalizohet pa u hequr taksa.