Mustafa: Fundjava do përcaktojë pakt ose ndarje rrugësh me VV
“Mbetemi të përkushtuar për marrëveshje, por duhet e balancuar”
Kreu i Lidhjes Demokratike të Kosovës, Isa Mustafa, ka folur para mediave pas mbledhjes së kryesisë së LDK- së të martën, ku deklaroi se është në kontakte të vazhdueshme me liderin e LVV- së, Albin Kurtin.
Mustafa tha se duhet të ulen të merren vesh a do të bëjnë marrëveshje apo jo, duke e lënë të hapur edhe perspektivën e ndarjes së rrugëve me Albin Kurtin. Mustafa tha se mbeten të përkushtuar që të punojnë për marrëveshje, mirëpo ajo duhet të bëhet duke respektuar vullnetin e qytetarëve. “Ju e dëgjuat deklaratën e kryesisë, ne mbetemi të përkushtuar që të punojmë për marrëveshje, mirëpo, një marrëveshje që respekton vullnetin e qytetarëve në zgjedhjet e tetorit. Ne mendojmë që marrëveshja duhet të nxjerrë në pah një qeveri të balancuar dhe përgjegjësi të balancuar në mes të dy palëve, në harmoni me besimin që na kanë dhënë qytetarët”, tha ai. Lideri i LDK- së shton se propozimi i tyre i fundit duhet që të trajtohet nga Lëvizja Vetëvendosje. “Ne kemi dhënë një propozim që mendojmë që është shumë i balancuar, të cilin VV duhet ta trajtojë me vëmendje të veçantë dhe mbesim të hapur që të ulemi të bisedojmë, por ajo duhet të ketë një përfundim sa më të shpejtë deri në fund të kësaj jave, që të bëjmë marrëveshjen ose të konstatojmë që nuk ka kushte që marrëveshja të bëhet. Këtu mbetemi me këto pozita, gjithsesi me vullnet që të përfundohet marrëveshja”, ka deklaruar ai. Mustafa shtoi se, “Ne me Kurtin gjatë kësaj periudhe kurrë s’kemi qenë jashtë komunikimit, por qëndrimi ynë është që në moment që ulemi ta bëjmë marrëveshjen e ta përfundojmë”, tha ai.
Ndërsa Zëdhënësi i Lidhjes Demokratike të Kosovës, Besian Mustafa, ka thënë se në mbledhjen e mbajtur të martën, kryesia ka trajtuar situatën politike në vend pas mandatimit të Albin Kurtit nga ana e Presidentit të vendit. Zëdhënësi i LDK- së shton se LDK edhe një herë shpreh vullnetin për marrëveshje politike. “LDK vlerëson se vendi ndodhet në një situatë të rëndësishme politike, meqë tani implementimi politik i vullnetit qytetarit të shprehur në zgjedhje është i afatizuar. LDK edhe njëherë shpreh vullnetin për marrëveshje politike të balancuar me LVV- në që do të reflektonte në tërësi rezultatin e zgjedhjeve”, tha ai. Zëdhënësi Mustafa ka shtuar se marrëveshja e propozuar nga ekipi negociues është opsioni i fundit, me të cilin ata negociojnë. LDK ka ftuar LVV- në të marrë përgjegjësinë për formim të institucioneve. “Kryesia e LDK konsideron që marrëveshja e propozuar nga ekipi negociues e mbështetur në orientimin e Këshillit të
Përgjithshëm e reflekton rezultatin e zgjedhjeve. LDK e fton Lëvizjen Vetëvendosje si parti e parë dhe që ka përgjegjësinë për të formuar institucionet e reja që të veprojë shpejt për të arritur marrëveshje me LDK- në”, tha ai.