KLP kërkon ligj të ri për hetimin e zyrtarëve nga SPAK, Qeveria ndryshon koncesionin e sterilizimit
Manastirliu: Rishikuam marrëveshjen, reduktim 25% të pagesave
Marrja e dosjes në dorëzim nga Prokuroria e Posaçme ( SPAK) dhe nisja e hetimeve mbi kontratën koncesionare për sterilizimin e pajisjeve mjekësore nuk është kapërdirë lehtë nga qeveria.
Një ditë më parë, ministrja e Shëndetësisë, Ogerta Manastirliu, ka njoftuar rishikimin e kontratës dhe reduktimin e pagesave me 25 për qind për kompaninë koncesionare, në mbi 64 mijë ndërhyrje. Pra, nëse kryhen mbi 64 mijë operacione, kostoja do të ulet me 25 për qind. “Kemi amenduar kontratën e sterilizimi, dua të bëj një parantezë këtu. Nuk është vetëm një kontratë që ofron vetëm sterilizimin, por pesë procese pune dhe të gjithë elementët që ofrojnë siguri maksimale për shëndetin e qytetarëve. Një amendim i kësaj kontrate ka ndodhur në javën e dytë të këtij muaji, duke reduktuar pagesat mbi 64 mijë ndërhyrje për kompleksitetet. Tani, mbi 64 mijë ndërhyrje, ka reduktim 25% të pagesave për kompleksitetet. Numri i ndërhyrjeve nuk shtohet se duam ne, por nga sëmundshmëria. Ne duhet të synojmë shumë te cilësia, kjo do të thotë se nuk janë të rëndësishëm numrat, por cilësia. Është bërë një vlerësim, i cili ka rakorduar që mund të rishikohet mbi një normale mbi 64 mijë ndërhyrje çmimi i seteve, kompleksitete të ndryshme, dhe është arritur për të reduktuar 25%, pra, mbi 64 mijë ndërhyrje”, tha Manastirliu dje gjatë vizitës në Spitalin e ri Kirurgjikal “Frederik Shiroka”, në QSUT. Sipas saj, ky hap i ndërmarrë nuk prek ndërhyrjet për qytetarët, por është negociuar ulja e çmimit për të përmbushur nevojat për ndërhyrje kirurgjikale dhe për të përdorur më me efikasitet burimet financiare.
KONTRATA
Kontrata për sterilizimin e pajisjeve mjekësore, që përdoren për ndërhyrjet kirurgjikale, është një nga koncesionet më të kontestuara, duke u vënë jo pak herë në shënjestër të akuzave për abuzime. E firmosur në 2014- n, kjo kontratë parashikon që për një periudhë 10vjeçare, qeveria t’i paguajë koncesionarit 100 milionë euro, një faturë e majme kjo që rëndon në xhepat e taksapaguesve shqiptare. Por skandali nuk mbyllet këtu. Këtë vit, fatura e koncesionarit është rritur me 35 milionë euro të tjera, duke e çuar vlerën e koncesionit nga 100 milionë euro që ishte, në 135 milionë euro.
HETIMET
Ndërkohë, prej fillimit të këtij viti, Prokuroria e Posaçme ( SPAK) ka nisur hetimet për kontratën koncesionare, pas denoncimit të bërë nga Nisma Thurje. Kështu, të gjitha dritëhijet dhe pikëpyetjet që shoqërojnë këtë koncesion pritet të marrin përgjigje në përfundim të hetimeve.
Nuk është vetëm një kontratë që ofron vetëm sterilizimin, por pesë procese pune dhe të gjithë elementët që ofrojnë siguri maksimale për shëndetin e qytetarëve. Një amendim i kësaj kontrate ka ndodhur në javën e dytë të këtij muaji, duke reduktuar pagesat mbi 64 mijë ndërhyrje për kompleksitetet. Tani, mbi 64 mijë ndërhyrje, ka reduktim 25% të pagesave për kompleksitetet.