Komisioneri i KE: Vendim politik për hapjen e negociatave
Olivér Várhelyi: Duhet të gjenden arsyet e refuzimit në samitin e tetorit, jo ata që ishin përgjegjës
Komisioneri i BE- së për Politikën e Fqinjësisë Europiane dhe Negociatat e Zgjerimit, Olivér Várhelyi, mbrojti fuqimisht nevojën që Shqipëria dhe Maqedonia Veriore të anëtarësohen në BE, duke folur në një intervistë ekskluzive për televizionin hungarez, “Hír TV”.
Ai tha se qëllimi përfundimtar ishte integrimi i plotë i Ballkanit Perëndimor në Bashkimin Europian, një rajon që gjithmonë i përket Evropës përgjatë historisë. I pyetur nga prezantuesi hungarez, Katalin Zöldhegyi, nëse mendimi i Presidentit francez, Macron, në lidhje me hapjen e negociatave me Shqipërinë dhe Maqedoninë e Veriut ka ndryshuar që vjeshtën e kaluar, Olivér Várhelyi tha se duhej të gjenden arsyet e refuzimit, jo ata që ishin përgjegjës. “Situata duhet të adresohet dhe duhet të vendoset një paketë politike që do t’i lejojë këto vende të mbështesin hapjen e negociatave me Maqedoninë Veriore dhe Shqipërinë pa ndonjë kompromis për qëllimin përfundimtar, që është integrimi i gjithë Ballkanit Perëndimor në Bashkimin Europian. Për Bashkimin Europian rajoni më i afërt me Ballkanin Perëndimor duhet të jetë Europa, ashtu siç ka qenë gjithmonë në histori”, theksoi Komisioneri i Zgjerimit të BE- së. Megjithë dështimin në tetor, Shqipëria dhe Maqedonia e Veriut vazhdojnë të aspirojnë për t’u anëtarësuar në Bashkimin Europian, përfundoi Oliver Várhelyi.
VIZITA Dy javë më parë, Eurokomisioneri për Zgjerimin ishte në Tiranë, ku tha se Komisioni Europian ka gati paketën që do të mundësojë metodologjinë e re të procesit të anëtarësimit. Ai foli dhe për punën që po bëhet me vendet skeptike, të cilat bllokuan hapjen e negociatave në samitin e tetorit 2019. Olivér Várhelyi tha se po punon me shtetet që ishin kundër hapjes së negociatave me Shqipërinë, si Franca dhe Holanda. “Kam qenë në Paris javën e shkuar. Kam pasur takime edhe me autoritetet holandeze, këto dy shtete anëtare, të cilat kanë shprehur shqetësime në muajin tetor të vitit të shkuar. Ne i kemi diskutuar këto shqetësime, që kanë këto dy shtete anëtare. Ndërkohë, unë, në fakt, po bisedoj dhe me të dyja këto shtete, të cilat u ndikuan nga samiti i tetorit dhe po përpiqem të shoh ecurinë, përparimin që është arritur tashmë dhe se çfarë do të mund të arrihet gjatë kësaj periudhe. Në fakt, jam shpresëplotë që me metodologjinë e re, me qasjen e re që do të ribalancojë, ekuilibrojë, në rast se mund ta them në këtë formë, negociatat për anëtarësim, jo vetëm për shtete që dëshirojnë të bëhen shtete anëtare, por edhe për shtetet anëtare të BE- së dhe po ashtu, me përparimin që po vazhdon të arrihet në Shqipëri dhe në Maqedoninë e Veriut, ne do të mund ta ndryshojmë klimën politike”, tha Várhelyi gjatë vizitës në Tiranë.