Si ndryshon procesi i negociatave sipas planit francez
Në Samtin e tetorit të Këshillit Europian, Shqipërisë dhe Maqedonisë së Veriut iu refuzua hapja e negociatave me Bashkimin Europian. Vendimi negativ për të dyja vendet e Ballkanit Perëndimor erdhi, edhe pse më herët institucionet e BE kishin deklaruar se Tirana dhe Shkupi i kishin përmbushur detyrimet e vendosura. Vetoja e Presidentit francez, Macron, për të mos ecur më përpara me këtë proces ishte vendimtare dhe në konferencën e mediave pas këtij samiti, Presidenti francez deklaroi se duhet një qasje e re e Unionit ndaj vendeve kandidate. Sipas tij, skema aktuale nuk ishte funksionale dhe rezultati konkret i reformave të kërkuara nga BE karshi vendeve kandidate shpesh mungonte. 4 muaj pas këtij vendimi, që gjithashtu shënoi një ndryshim në politikën e Brukselit, kanë filluar të dalin detajet e para të skemës së re të propozuar nga Parisi për procesin e negociatave me vendet kandidate. Në javët e fundit të muajit dhjetor në mediat ndërkombëtare qarkulloi një dokument, që fliste mbi mënyrën sesi Franca kërkonte që të bëhej procesi i negociatave për anëtarësim. “Pasi të hapen negociatat, procesi i integrimit nuk do të bazohet më në hapjen e kapitujve të njëpasnjëshme, por në disa faza të njëpasnjëshme, të cilat do të formojnë blloqe koherente të politikave dhe skemë të vendosur nga BE- ja, duke i marrë parasysh karakteristikat specifike të secilit kandidat, ku është e nevojshme”, thuhej ndër të tjera në dokument. Gjithashtu, Parisi zyrtar propozon, kalimin nga njëra fazë në tjetrën që të ekspozohet në hollësi, ndërsa kryesisht do të bazohej në progres të vazhdueshëm, të pacaktueshëm në sferën e sundimit të së drejtës. Vendet kandidate do të duhet t’i përshtatin aftësitë e tyre institucionale dhe administrative. Për anëtarësimin final do të vendoset në bazë të përmbushjes së aspiratave konkrete ekonomike dhe sociale. Gjithashtu, sipas këtij propozimi parashihet ndihmë financiare e plotë në periudhën para anëtarësimit për vendet e Ballkanit Perëndimor, që nënkupton instrumente më të mëdha para anëtarësimit dhe qasje deri te fondet strukturuese, të cilat tani janë të rezervuara vetëm për vendet anëtare të BE- së. Propozimi kyç i Francës është në miratimin e parimit të kthyeshmërisë, sepse vlerësohet se kjo do ta sigurojë besimin dhe natyrën inkurajuese të procesit. Një parimi i tillë, sipas planit të Macron, është i domosdoshëm në situata kur vendi kandidat pjesërisht ose aspak nuk përmbush kritere të caktuara ose ka ndaluar avancimin me detyrimet e ndërmarra. Detaje të reja rreth kësaj metodologjie të re të zgjerimit të BE- së dha edhe kreu i KE- së dje në vizitën e parë në Tiranë. Charles Michel shpjegoi se procesi i zgjerimit do të bazohet kryesisht mbi tri shtylla, ku do të kërkohen reformat. Edhe Macron u shpreh optimist gjatë vizitës së tij në Kroaci pak ditë më parë, ku theksoi se me metodologjinë e re shpreson që të ketë rezultate pozitive.