Gazment Bardhi: T'ua kthejmë pushtetin vendor qytetarëve
Sekretari i përgjithshëm i Partisë Demokratike, Gazment Bardhi, ka vijuar turin e takimeve me bazën demokrate. Dje, numri dy i Partisë Demokratike është ndalur në disa takime me demokratët e Kamzës, Paskuqanit, Vorës dhe Rrogozhinës. Përmes një postimi në rrjetet sociale, Bardhi thekson se tashmë ka ardhur koha që pushteti lokal t'u kthehet qytetarëve dhe jo shërbëtorëve të Ramës, siç i quan ai kryebashkiakët e zgjedhur më 30 qershor. Më tej, Bardhi thekson se në takimet me banorët e këtyre zonave, PD- ja merr shumë energji, pasi bëhet fjalë për zona që drejtohen nga kryebashkiakë që nuk kanë mbështetje më të gjerë se 6%, sipas tij. "Banorët e Kamzës, Paskuqanit, Vorës dhe Rrogozhinës janë më të diskriminuarit dhe më të papërfaqësuarit. Ata drejtohen nga kryebashkiakë ilegjitimë, të votuar nga vetëm 6 për qind e elektoratit, si në rastin e Kamzës. Me gjithë presionin, kërcënimet dhe padrejtësitë, demokratët në Kamzë, Paskuqan, Vorë dhe Rrogozhinë janë në kontakt të vazhdueshëm me qytetarët, të gatshëm t'i japin Partisë Demokratike dhe opozitës energjinë e fitores. Së bashku po punojmë që t'u kthejmë qytetarëve të drejtën për të zgjedhur, të drejtën për të kërkuar llogari, të drejtën për të shkarkuar Kryeministrin dhe kryebashkiakun që nuk mban premtimet. Pushteti vendor duhet t'u kthehet qytetarëve, që me votë të lirë të zgjedhin kryebashkiakun që punon për interesin e tyre dhe jo të qeverisen nga shërbëtori i radhës i pushtetit të kriminalizuar të Edi Ramës", shkruan Gazment Bardhi në rrjetet sociale, ku nuk jep shumë detaje në lidhje me aksionin opozitar për ditët dhe javët e ardhshme.