Vasili: Hetim nga SHBA dhe BE për hetimin e Reformës në Drejtësi
Nënkryetari i LSI- së, Petrit Vasili, ka lëshuar akuza shumë të ashpra në drejtim të Reformës në Drejtësi. Përmes një konference për mediat, Vasili theksoi se 4 vite pas fillimit të kësaj reforme, rezultatet janë kundër pritshmërive që kishte krijuar publiku në fillim. Sipas tij, është shumë e nevojshme që të ngrihet një komision ndërkombëtar me ekspertë nga SHBA dhe BE për të hetuar mënyrën se si është zbatuar Reforma në Drejtësi. "Tani kemi hyrë në vitin e katërt të kësaj reforme, por konstatohet se ngjarje shumë të rënda, vendimeve skandaloze, institucione të bllokuara dhe pandëshkueshmëri që thellohet e që ka thelluar më tej në mënyrë dramatike korrupsionin në Shqipëri. Kemi një drejtësi, e cila nuk ndëshkon ata që neglizhuan paralajmërimet e Presidentit dhe dhanë garanci të rreme e shteti rezultoi tërësisht i papërgatitur për të përballuar katastrofën dhe për të shpëtuar jetë njerëzish. Ndaj tyre nuk ka asnjë qëndrim, nuk ka asnjë përgjegjës, nuk ka asnjë hetim. Kemi një drejtësi, e cila sot liron pa iu dridhur qerpiku, njëri pas tjetrit, kriminelë të rrezikshëm, ku as mendja më e çartur nuk do të ekzistonte, ku as drejtësia e vjetër nuk rrezikoi të binte në këto nivele. Ndaj sot, kjo reformë që ka hyrë në vitin e katërt të saj, duhet shpëtuar patjetër për të mirën e popullit shqiptar, dhe ne kërkojmë qartë dhe prerë ngritjen e një komisioni hetim- monitorimi të BE- së dhe SHBA- së për zbatimin e Reformës në Drejtësi dhe për përdorimin e fondeve në dispozicion të saj", tha Vasili.
LIDHJET NEPOTIKE
Për numrin dy të LSI- së, rreziqet e paralajmëruara tashmë po ndodhin dhe reforma me institucionet kryesore të saj janë marrë në dorë nga maxhoranca. Sipas tij, KED, ILD dhe KLP tashmë drejtohen nga njerëz me lidhje të qarta nepotike me PS- në. "Ne kërkojmë ngritjen e këtij komisioni hetim- monitorimi BE- SHBA, sepse gjykatat më të larta, Kushtetuese dhe ajo e Lartë, nuk funksionojnë dhe zgjedhja e anëtarëve të Gjykatës Kushtetuese është sulmuar për t'u kapur nga Rilindja, duke tentuar të rrëmbejë edhe kompetencën e Presidentit për këtë qëllim. Rreziqet e paralajmëruara nga Komisioni i Venecias për kapjen e vetingut nga qeveria janë evidente dhe organizma joqeveritare, si Komisioni i Helsinkit, kanë evidentuar vetingut me dy standarde. Gjithashtu, ODIHR- i, në raportin e votimeve të 30 qershorit, ka evidentuar qartë se gjyqtarët nga frika dhe presioni i vetingut jepnin vendime në favor të qeverisë. Pra, vetingu si mjet shantazhi, për të dhënë vendime në favor të qeverisë. Nepotizmi dhe kapja politike e drejtuesve të institucioneve nga Rilindja është fakt evident dhe i qartë flagrant, madje dy prej tyre, KLP- ja dhe Inspektori i Lartë i Drejtësisë, janë qartazi familjarë të afërt me Rilindjen. KED, një tjetër institucion i rëndësishëm në këtë proces, u kthye në një institucion të politikave personale, me shkelje flagrante të kryetarit të saj, duke cenuar rëndë transparencën e tij", u shpreh nënkryetari i LSI- së.