Grabiti bizhuteri, ekstradohet 37- vjeçari nga Gjermania
Sako është dënuar nga Krimet e Rënda me 9 vite burg për grabitje
Policia njoftoi dje se Elton Sako, i dënuar për grabitje me dhunë, është arrestuar dhe ekstraduar nga Gjermania. Sipas burimeve zyrtare, arrestimi i tij ka ardhur falë shkëmbimit të informacionit me Interpol Tirana dhe autoriteteve Policore gjermane. "Kapet në Gjermani dhe ekstradohet drejt Shqipërisë, 37- vjeçari i dënuar me 9 vite burg. Nga Zyra Qendrore Interpol Tirana u krye ekstradimi nga Gjermania drejt vendit tonë, i shtetasit shqiptar Elton Sako, 37 vjeç, banues në Tiranë. Ky shtetas ishte i shpallur në kërkim ndërkombëtar nga ZQK Interpol Tirana, pasi Gjykata e Krimeve të Rënda e ka dënuar me 9 vite burg, për veprën penale ' Vjedhje me dhunë e kryer në bashkëpunim'. Shtetasi Elton Sako, në bashkëpunim me shtetasit S. M., dhe L. M., në vitin 2012 kanë hyrë në banesën e shtetasit V. B., në rrugën ' Qemal Stafa', ku në banesë ndodhej vajza e mitur dhe nën kërcënimin e armëve dhe të maskuar, kanë vjedhur një sasi bizhuterish. Falë informacioneve të marra nga strukturat e Policisë së Shtetit për vendndodhjen e këtij personi, si dhe shkëmbimit të informacionit mes Interpol Tirana dhe Policisë Gjermane u bë i mundur lokalizimi dhe arrestimi i 37- vjeçarit, me qëllim ekstradimin drejt vendit tonë", njoftoi Policia këtë të shtunë.
NGJARJA
Tre të rinj me maska dhe armë janë futur për të grabitur një banesë në Tiranë, duke terrorizuar një vajzë 13- vjeçare që ndodhej brenda në momentin e ngjarjes. Një prej autorëve ka mbajtur vajzën, duke i mbyllur gojën me duar dhe e ka kërcënuar më armë që të mos bërtiste, ndërsa dy të tjerët kanë vjedhur bizhuteritë e të ëmës së saj, që ndodheshin në dhomën e gjumit. Ngjarja ndodhi mbrëmjen e 22 janarit 2012, në banesën private të Veledin Brahimit, që ndodhet pranë Prokurorisë së Përgjithshme, në Tiranë. Burime zyrtare nga Policia e kryeqytetit thanë në atë kohë se, duke përdorur metodat speciale të hetimit, ishte bërë e mundur identifikimi dhe arrestimi i dy prej autorëve, ndërsa bashkëpunëtori tjetër i tyre është shpallur në kërkim. Kështu, në atë kohë në pranga u vunë Serxho Muho, 23 vjeç dhe Luan Maçi, 27 vjeç, ky i fundit i dënuar më parë për "Armëmbajtje pa leje". Ndërsa u shpall në kërkim 28vjeçari Elton Sako, i cili gjithashtu ka marrë pjesë në grabitje. Policia tha se në cilësinë e provës materiale janë sekuestruar disa prej bizhuterive të vjedhura, si dhe një shumë prej 13 mijë lekësh të rinj, që kishin përfituar nga shitja e një varëseje dhe një unazeje floriri, që kishin grabitur.
GRABITJA
Rreth orës 18: 30, Veledin Brahimi ka dalë nga shtëpia e tij, në rrugën "Qemal Stafa", në Tiranë, bashkë me pjesëtarët e tjetër të familjes, tre të rinj, që sipas Policisë kanë qenë duke "vëzhguar" lëvizjet e tij, kanë nisur të vënë në zbatim planin për t'i grabitur shtëpinë. Grabitësit kanë qenë në dijeni se vajza 13- vjeçare e Brahimit ndodhej vetëm në shtëpi, pasi ajo kishte mbyllur derën në momentin kur familjarët e saj kanë dalë. E megjithatë, ata kanë vazhduar planin e tyre, duke trokitur në derë, të cilën e ka hapur vajza që ndodhej në shtëpi. Menjëherë sapo ajo ka hapur derën, njëri nga grabitësit, e ka kapur në krahë duke i mbyllur gojën me dorë, në mënyrë që të mos bërtiste për të kërkuar ndihmë. Ndërsa me dorën tjetër, e ka kërcënuar me pistoletë, duke ia drejtuar në kokë. Dy bashkëpunëtorët e tij janë drejtuar në dhomën e gjumit, të prindërve të 13- vjeçares dhe kanë marrë të gjitha bizhuteritë që ndodheshin aty e më pas janë larguar. Sapo janë larguar grabitësit, vajza e terrorizuar ka telefonuar prindërit e më pas është lajmëruar edhe Policia.