PROCEDURAT DHE SKEMAT E KOMPENSIMIT TË PRONARËVE

Prioriteti i mënyrave të kompensimit përcaktohet sipas rendit të mëposhtëm:

a) kompensim fizik në ish- pronën e subjektit të shpronësuar; b) kompensim fizik nga fondi i tokës; c) kompensim financiar.

Kompensimi fizik në pronën e njohur

ATP- ja fillon procedurën e kompensimit, duke i dhënë përparësi kompensimit fizik në pronën e subjektit të shpronësuar. Vetëm në rastet kur kjo nuk është e mundur, ATP- ja kalon në format e tjera të kompensimit. Kur prona konsiderohet e zënë, në kuptim të ligjit nr. 133/ 2015, ATP- ja nuk procedon me kompensim fizik mbi këtë pronë, por me një nga mënyrat e tjera të kompensimit.

Kompensim financiar dhe kompensim fizik

Në të gjitha rastet kur subjekti nuk përfiton kompensim fizik, sipas shkronjës “a”, të pikës 16/ 2, dhe ka një vendim përfundimtar, të vlerësuar financiarisht, përfiton kompensim financiar nga fondi financiar i kompensimit, deri në 20 % të vlerës totale të kompensimit financiar, por jo më shumë se 10 000 000 ( dhjetë milionë) lekë, sipas shkronjës “a”, të pikës 1, të nenit 8, të ligjit nr. 133/ 2015, dhe pjesa e mbetur nga vlerësimi i vendimit përfundimtar kompensohet fizikisht nga fondi i tokës. Në shpërndarjen e fondit të tokës, ATP- ja udhëhiqet nga kriteri i përzgjedhjes së pronës gjeografikisht më pranë pronës së njohur për kompensim. ATP- ja kryen kompensimin financiar vetëm kur nuk është i mundur kompensimi fizik në ish- pronën e subjektit të shpronësuar.

Ankandi

Të gjitha subjektet që kanë një vendim përfundimtar, i cili ka njohur të drejtën për kompensim pavarësisht rendit kronologjik, kanë të drejtë të marrin pjesë në ankand, nëse ata shprehin vullnetin me anë të kërkesës për të përfituar kompensim fizik nga fondi i tokës.

Kompensimi fizik me fondin e tokës

ATP- ja procedon me kompensim sipas parashikimeve të këtij kreu, vetëm pasi ka përfunduar procedurat e kompensimit fizik mbi pronën e njohur dhe subjekti nuk ka bërë aplikim për ankand. Subjektet mund të paraqesin kërkesë për t’u trajtuar me kompensim fizik nga fondi i tokës. Kriteri për shpërndarjen e fondit të tokës për kompensim fizik është që ATP- ja të përzgjedhë pronën gjeografikisht më pranë pronës së njohur për kompensim.

Kompensimi financiar

ATP- ja kryen kompensimin financiar të subjektit pasi janë ezauruar të gjitha mundësitë sipas rendit të përcaktuar dhe kur nuk janë paraqitur kërkesa të veçanta sipas krerëve IV e V, të këtij vendimi.