Zbardhet fondi i ri, sa para marrin pronarët
Edhe pas tërmetit qeveria do të ndajë 45 milionë USD për kompensimin e pronarëve. Gazeta zbardh vendimin edhe për dëmshpërblimin e ish- të përndjekurve
Me përfundimin e procesit të dëmshpërblimit për ish- të përndjekurit që jetojnë, Ministria e Financave ka përgjysmuar fondin në adresë të kësaj kategorie.
Për këtë vit, janë akorduar vetëm 1 miliard lekë ose rreth 10 milionë dollarë, që do të përdoren për ndarjen e këstit të tretë për trashëgimtarët e të dënuarve. Ndërkohë, për skemën e kompensimit të pronarëve janë vënë në dispozicion për vitin 2020, 4.5 miliardë lekë ose rreth 45 milionë dollarë. Të përndjekurit Vitin e kaluar, Ministria e Financave çeli këstin e 12- të për të përndjekurit që bëjnë pjesë në kategorinë parësore. Nga ky institucion mësohet se ka mbetur vetëm një numër i ulët përfituesish nga kjo kategori. Kjo do të thotë që në pjesën dërrmuese, fondi vjetor do të përdoret për ndarjen e këstit të tretë për ata të dënuar që nuk jetojnë dhe përfitues janë fëmijët e tyre. Nga ana e Ministrisë nuk ka ende një skemë për mënyrën sesi do të ndahen paratë, pra nëse do të ketë një rend përparësie apo do të kryhen mbi bazën e pagesave të mëparshme. Deri më tani janë marrë rreth 4 mijë dosje në shqyrtim me vendime 2008 dhe 2009.
PRONAT Për pronarët, këtë vit janë parashikuar të ndahen 4.5 miliardë lekë ose rreth 45 milionë dollarë. Në arkën e ATP- së janë edhe rreth 30 milionë dollarë të tjerë, fondi i transferuar nga viti që lamë pas, i cili do të ndahet këtë vit. Përfundimi i vlerësimit financiar për rreth 25 mijë vendime të formës së prerë iu jep mundësi të gjithë atyre që janë njohur me masën e përfitimit, të paraqiten në agjenci për të aplikuar. Përveç kompensimit në pronën e njohur, pronarët mund të zgjedhin pjesëmarrjen në ankand, kompensimin nga fondi i tokës që ATP disponon, kompensim financiar e fizik njëherazi apo pagesën me këste përgjatë 10 viteve. Me ndryshimet e bëra, pronarëve iu lind e drejta të kompensohen financiarisht. Por, për kompensimin në të holla është vendosur një prag, çka do të thotë se ata mund të marrin 20% të vlerës së faturës por jo më shumë se 10 milionë lekë të reja. Për pjesën e mbetur do të kompensohen nga fondi i tokës. Në shpërndarjen e fondit të tokës, Agjencia e Trajtimit të Pronave udhëhiqet nga kriteri i përzgjedhjes së pronës gjeografikisht më pranë pronës së njohur për kompensim.