Rama premton 10 marsin për rindërtimin, Basha: Vetëm korrupsion dhe gënjeshtra
Rama, apel zyrtarëve: Mos hyni në gjynah, bëjeni këtë punë si të kishit mbetur vetë pa shtëpi, do ndëshkoheni
Kryeministri Rama tha dje se rindërtimi i zonave të prekura nga tërmeti do të nisë më 10 mars, pasi të ketë përfunduar aplikimi, vlerësimi, apelimi, përcaktimi i zonave ku do të ndërtohet dhe modeli i banesave.
Ai tha se raporti final për dëmet nga tërmeti i 26 nëntorit do të bëhet publik më 4 shkurt, ndërsa nga të dhënat e deritanishme, bëhet fjalë për pak mbi 1 miliard euro. Gjatë prezantimit të platformës online për qytetarët që përfitojnë nga programet e rindërtimit, kreu i qeverisë tha se do të ndëshkohen të gjithë ata kryebashkiakë e zyrtarë, që do të fusin në listën e përfituesve edhe njerëz që nuk janë prekur vërtet nga tërmeti. Ai deklaroi se i gjithë procesi do të monitorohet nga një grup i panjohur. "Mos hyni në gjynah, bëjeni këtë punë njësoj sikur do të ishit ju që do të mbeteshit pa shtëpi. Mos merrni iniciativa individuale për të regjistruar si të prekur nga tërmeti njerëz që nuk janë prekur, se do të ndëshkoheni, pasi do monitoroheni nga një grup që s'e njihni. Kryebashkiakëve iu them faleminderit, sepse iu ka rënë mbi kokë një hall i madh, që e kanë përballuar me dinjitet, por që duhet t'i qëndrojnë në kokë, që regjistri elektronik i familjeve të jetë shembullor dhe aty të jenë të gjithë ata që kanë nevojë. Të gjitha do të monitorohen dhe kush do të kapet duke abuzuar, do të ndëshkohet", tha Rama. Ai tregoi edhe planin e qeverisë për të grupuar qytetarët në qendra të grumbulluara banimi, duke i shpërngulur nga banesat e veçuara. "Prona në shtëpitë e tyre që janë prekur, mbetet e tyre. Ata do të marrin shtëpitë e tyre, në një pronë që s'është e tyre. Do të përfitojnë pronë. Nuk do të humbasin pronë. Do të përfitojnë në çdo aspekt, sepse nëse sot i kanë shtëpitë me distancë nga shërbimet dhe duhet që e gjithë familja të angazhohet, që për të shkuar në shkollë fëmijët e deri te të moshuarit, që duan të shkojnë në spital, duke u afruar kanë mundësi të tyre. Tokën e tyre në zonat rurale do të vazhdojnë ta punojnë. S'ka pse të zhvendoset e gjithë familja. Ai foli për një plan shembullor rindërtimi të banesave të dëmtuara. "Duhen identifikuar zonat, për të parë me nikorqillëk, për të mos shkuar në zona private, për të mos bërë shpronësime, por në zona publike, nuk është e thjeshtë se ç'po heqim. Përtej aspektit të bazës ligjore dhe të planifikimit, qëndron aspekti i garantimit të të gjithë parametrave të rindërtimit. Parametrat e ndërtimit do të jenë të padiskutueshme. Duhet të jenë antisizmike, që nëse ndodh në të ardhmen një lëkundje e fortë, shtëpitë të jenë shumë herë më rezistente dhe të garantojnë cilësi jete. Dhe në zonat urbane ku do ndërtojmë blloqe banimi, të jenë shembullore të të gjithë parametrave", tha Rama.