Gjonaj kërkoi hetim penal për gjyqtaren Enkeleida Hoxha
Opozita thërret ministren në interpelancë për burgjet
Ministrja e Drejtësisë, Etilda Gjonaj, disa ditë pas vendimit për lirimin e Endrit Dokles, e ka konsideruar si skandaloz dhe kërkoi nisjen e procedurave të shkarkimit të gjyqtares Enkeleida Hoxha.
Edhe më herët, tha Gjonaj dy javë më parë, kemi ngritur shqetësimin për gjyqtaren në fjalë, duke rikujtuar edhe vendimin për lirimin e të dënuarit me burgim të përjetshëm, Genc Tafili. Gjonaj shtoi se në datën 15 janar i është drejtuar KLGJsë për pezullimin e gjyqtares. "Si rezultat i shkeljeve të konstatuara dhe duke mbajtur parasysh se veprime të tilla, me pasoja të rënda në çështjet e rendit dhe sigurisë në vend, kanë krijuar zemërim të opinionit të gjerë publik, kanë cenuar rëndë paanshmërinë dhe objektivitetin në dhënien e drejtësisë, në datën 15 janar: I jam drejtuar Këshillit të Lartë Gjyqësor për pezullimin e menjëhershëm të gjyqtares nga detyra, si dhe marrjen e masave për shkarkimin e saj nga detyra si gjyqtare, me qëllim mostolerimin e asnjë vendimi të tillë, i cili sfidon haptazi procesin e reformimit të sistemit të drejtësisë dhe punën e përkushtuar të institucioneve të reja në këtë proces jetik për forcimin e shtetit të së drejtës", tha dje Gjonaj. Në fjalën e saj, ministrja Gjonaj tha se kishte kërkuar hetimin penal të gjyqtares dhe përshpejtim të procedurave të rivlerësimit në kuadër të vetingut. Ndërkohë, me anë të një shkrese të bërë publike dje, disa deputetet të Kuvendit, kanë kërkuar thirrjen në interpelancë urgjente të ministres, ku pritet të diskutohet gjendja në sistemin e burgjeve.