Kokaina në Greqi, Policia shqiptare: Identifikuam anëtarët dhe rolet në grup
“Policia shqiptare dha ndihmesë dhe kontribut në identifikimin e personave të organizatës, roleve të tyre individuale”
“Kontribuuam në identifikimin e anëtarëve të grupit kriminal”, njoftoi dje Policia e Shtetit në lidhje me operacionin e zhvilluar në Greqi tri ditë më parë, ku u arrestuan dhe disa shqiptarë.
Sipas burimeve zyrtare, ky ishte një nga operacionet më të mëdha të zhvilluara për goditjen e grupeve kriminale që bashkëveprojnë për të sjell nga Karaibet në Europë sasi të konsiderueshme lënde narkotike, kokainë. Sipas mediave greke, në pranga gjatë këtij operacioni ranë 8 persona, pjesa më e madhe e tyre shqiptarë. Ndërkohë, në njoftimin zyrtar, Policia e Shtetit nuk bëri të ditur emra apo numrin e shqiptarëve të arrestuar. “Kjo është një nga çështjet më të mëdha të trajtuara nga Divizioni i Luftës ndaj Drogës, për goditjen dhe shpërbërjen e një organizate kriminale, që ka transportuar në mënyrë sistematike, sasi të konsiderueshme kokaine nga Karaibet në Europë dhe Afrikën VeriPerëndimore. Gjatë konferencës për shtyp, të mbajtur në Greqi, Drejtori i Sigurisë së Atikës, Petros Jeferis, tha: “Ky operacion u parapri nga muaj të tëra hulumtimesh sistematike, të cilat zgjatën më shumë se gjashtë muaj, në bashkëpunim me Zyrën e DEA në ambasadën amerikane në Athinë, autoritetet e Policisë shqiptare dhe asaj spanjolle, ndërsa zhvilluam bashkëpunim ndërsektorial me SDOE në Ministrinë e Financave dhe degës së Prokurorisë për lëndë narkotike dhe trafikim, si dhe Rojën Bregdetare Greke”, shkruhet në njoftimin e Policisë.
IDENTIFIKIMI Sipas njoftimit zyrtar, Policia ka ndihmuar në identifikimin e personave të përfshirë në këtë rast trafiku. Me anë të hetimeve të kryera, tha Policia, është bërë e mundur identifikimi i personave, roleve që kanë pasur dhe mënyrën si funksiononte. “Në këtë operacion, Policia e Shtetit shqiptar mori pjesë në mënyrë të drejtpërdrejtë me hetime pro- aktive, që u zhvilluan duke dhënë një ndihmesë dhe kontribut në identifikimin e personave të organizatës, roleve të tyre individuale dhe në mënyrën e funksionimit të organizatës kriminale, gjë që na mundësoi të identifikohen dhe konstatohej plotësisht përbërja dhe veprimtaria e saj”, njoftoi Policia.
OPERACIONI Rreth 1.2 tonë kokainë e nisur nga Amerika e Jugut, është sekuestruar mëngjesin e së shtunës gjatë një operacioni të menaxhuar nga Drejtoria e Sigurisë së Atikës në Greqi. Mediat greke shkruanin se gjatë këtij megaoperacioni është goditur një organizatë kriminale që transportonte sistematikisht sasi të konsiderueshme të kokainës nga Karaibet në Europë dhe Afrikën e Veriut, duke përdorur rrugët detare. Tetë persona u arrestuan në operacione paralele të organizuara në Kallithea, Ilion, Pagrati dhe Nea Smyrni, shumica e të cilëve janë shtetas shqiptarë. Të gjithë ata janë arrestuar në të kaluarën për çështje droge, sulme të armatosura të Policisë, grabitje të armatosur, falsifikime dhe vepra të tjera penale. “Droga ishte nisur nga Republika Domenikane në Karaibe. Autoritetet u vunë në lëvizje kur mësuan nga një polic i infiltruar në organizatë se rrjeti po kërkonte një jaht, që do të transportonte drogën drejt Europës. Dy nga shqiptarët e arrestuar bënë edhe një pagesë paraprake prej 120 mijë dollarësh”, shkruajnë mediat greke.