Virusi që përhapet me shpejtësi të frikshme, konfirmohen raste në Europë
Autoritetet kineze thanë se koronavirus ka ardhur nga mishi i kafshëve të egra të shitura në tregun e qytetit Wuhan, një qytet me 11 milionë banorë dhe kryeqytet i provincës Hubei në Kinën Qendrore. Gjarpërinjtë kinezë krait dhe kobra kineze mund të jenë burimi origjinal i koronavirusit, që ka shkaktuar një shpërthim të një sëmundjeje vdekjeprurëse infektive të frymëmarrjes në Kinë dhe shtete të tjera këtë dimër. Krait ( Bungarus multicinctus) është një specie shumë helmuese e llojit elapid, që gjendet në pjesën më të madhe të Kinës Qendrore dhe Jugore dhe Azisë Juglindore.
Sëmundja e ngjashme me pneumoninë është përhapur me shpejtësi të madhe që nga fundi i dhjetorit. Kina po lufton me përhapjen e infeksionit në vend, rastet e të cilit janë shtuar me 50 për qind në 24 orë. Raste të konfirmuara ka pasur edhe jashtë Kinës. Në Kinë, numri i viktimave është të paktën 50 vetë, me më shumë se 2000 raste të tjera të konfirmuara. Kina ka futur në karantinë 35 milionë njerëz. Por sërish mund të jetë shumë vonë për të ndaluar përhapjen e virusit të ri të rrezikshëm rreth botës. Virusi i quajtur 2019- nCoV është i ri për shkencën dhe askush nuk di saktësisht se si të ndalojë përhapjen e tij apo sa lehtësisht transmetohet. Dhe nuk ka vaksinë kundër tij. Sipas shkencëtarëve, gjithçka që ata po provojnë tani është krejtësisht eksperimentale. Situata është dramatike, pasi virusi me sa duket shpërndahet nga ajri dhe njerëzit preken prej tij përpara se të nisin simptomat e dukshme.
Në Shtetet e Bashkuara, një burrë u konfirmua me virusin disa ditë pasi u kthye nga një rajon rreth Wuhan, pas 15 janarit. Një grua në Çikago u konfirmua me virusin pasi kishte udhëtuar në Wuhan në fund të dhjetorit dhe ishte kthyer më 13 janar. Të dielën u konfirmua rasti i tretë në Kaliforni, nga një udhëtar kinez që kishte qenë në Wuhan.
Raste ka pasur në të gjithë Azinë, përfshirë Japoninë, Vietnamin, Tajlandën, Singaporin, Korenë e Jugut, Tajvanin dhe territoret kineze të Hong Kongut dhe Makaos, një rast është konfirmuar në Kanada dhe të premten u konfirmuan dy raste në Francë, duke shënuar hyrjen e virusit në Europë. Rreth 400 milionë njerëz janë në lëvizje në
Kinë për të shënuar Vitin e Ri Hënor, i cili nis të shtunën.
Coronavirus shfaqet që nga simptomat e një gripi të zakonshëm, në një sëmundje shumë më të rrezikshme që mund të infektojë njerëzit dhe kafshët, duke përfshirë sindromë të rëndë akute të frymëmarrjes apo SARS, si dhe sindromën e frymëmarrjes të Lindjes së Mesme të njohur si MERS.