Protesta antiqeveritare në Irak, 12 të vrarë në tri ditë
Të paktën 12 njerëz janë vrarë dhe 230 të tjerë janë plagosur gjatë tri ditëve të fundit të protestave në Irak, sipas Komisionit të Lartë për të Drejtat e Njeriut. Që kur nisën protestat tre muaj më parë, më shumë se 600 njerëz kanë humbur jetën, sipas IHCHR dhe “Amnesty International”. Sipas aktivistëve, Policia u bë agresive të premten në protestë, pasi kleriku shiit Muqtada al- Sadr njoftoi se ai nuk i mbështet më protestat antiqeveritare. Qindra nga mbështetësit e tij u larguan nga sheshi “Tahrir”. Protesta nisi më 1 tetor, e organizuar në rrjetet sociale, për të kundërshtuar 16 vite korrupsioni në qeveri, papunësinë dhe pamjaftueshmërinë e shërbimit publik. Më vonë ato u përshkallëzuan në thirrje për të rrëzuar administratën dhe për të ndaluar ndërhyrjen e Iranit në Irak, pas konfliktit me SHBA- në. Kryeministri Adil Abdul- Mahdi njoftoi më 29 nëntor 2019 se ka dhënë dorëheqjen. Më 26 dhjetor, Presidenti Barham Salih paraqiti gjithashtu një letër dorëheqjeje, pasi refuzoi të emërojë si Kryeministër të ri guvernatorin e Basras, Asaad Al Eidani, i cili u propozua nga blloku Bina, një bllok parlamentar i mbështetur nga Irani. Presidenti tha se Al Eidani nuk do të miratohej nga protestuesit. Policia është akuzuar se ka përdorur municione të vërteta, ujë të nxehtë dhe gaz lotsjellës kundër protestuesve. Sipas BBC- së, protestuesit kërkojnë fundin e këtij sistemi politik, i cili ka ekzistuar që pas pushtimit të SHBA për të rrëzuar Saddam Hussein dhe është shënuar nga ndarjet sektare. Kjo protestë është më e madhja që nga rënia e Hussein.