MBI 5 MIJE LEKE
Pensionet, kategoritë që përfitojnë rritjen
Zbardhen vendimet e ISSH me emrat e atyre që marrin shtesat në Tiranë dhe rrethe. Çfarë përfitohet nëse aplikoni shpejt në sportele
Llogaritjet për shtesën e pensioneve për minatorët, naftëtarët dhe metalurgët bëhen mbi bazën e kontributeve të derdhura ndër vite.
Në këtë mënyrë, sa më shumë vite pune, aq më i lartë edhe përfitimi. Sipas ISSH, ata që kanë aktualisht një pension mbi 24 mijë lekë dhe kanë mbi 25 vite pune, marrin më shumë se 5 mijë lekë shtesë në muaj. Nga nisja e procesit deri më tani, Instituti i Sigurimeve Shoqërore ka marrë 10 vendime duke e çuar në 6916 numrin e përfituesve në total, nga 23 400 që parashikohet të trajtohen me këtë skemë. Gazeta boton sot emrat e pensionistëve në Tiranë dhe rrethe që iu është llogaritur përfitimi me skemën e re dhe mund të paraqiten në çdo pikë shpërndarjeje për ta tërhequr atë.
AFATET PËR KËRKESËN
Për ata pensionistë që ende nuk kanë aplikuar, llogaritja e shtesës do të bëhet vetëm pas dorëzimit të kërkesës nga ana e tyre. Ndërkohë, vlen të thuhet po ashtu se nga rritja përfitojnë vetëm ata që kanë ushtruar profesione të klasifikuara si të vështira dhe shumë të vështira. Procesi i aplikimeve, bën me dije ISSH, nuk është i kufizuar në afat. Por avantazhi është që nëse aplikimi kryhet deri më 5 korrik të vitit 2020, pensionistët do të kenë mundësi që të marrin edhe shtesën e 11 muajve paraardhës. Kjo, sepse ligji përcakton që efektet të nisin nga hyrja në fuqi e tij. Ndërkohë, nëse dorëzimi i kërkesës bëhet pas datës 5 korrik të 2020- s, efektet do të nisin prej momentit të aplikimit, pra hiqet mundësia e marrjes së shtesës për muajt paraardhës. Për procesin e aplikimit, krahas kërkesës, pensionistët duhet të dorëzojnë edhe një kopje të kartës së identitetit, si edhe çdo dokument tjetër që vërteton llojin dhe periudhën e punës për efekt pensioni.
SKEMA
Ligji për trajtimin suplementar parashikon që rritja për minatorët të bëhet me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Në këto kushte, shtesa varion mesatarisht nga 12 për qind deri në 20 për qind mbi masën e pensionit.